اوروم نیوز، اکمه مه طرحی(طرح نکاشت) یاجیغاتی چایی نین قایناقلاریندان موقتی اولاراق اکین ساحه لرینده اکمه مه طرحی، مهر آیی نین بیریندن دولت طرفیندن سونولدو.
بو طرح ۶۱ مین هکتار اکین یئرینده اجرا و هر هکتارادا 50 میلیون ریال اؤده نیله جک ایدی.
بو آرادا اکینچی لیک غربی آذربایجانین بیرینجی ایش امکانی اولدوغونا گؤره، ولایتین ملت وکیللری بو طرحین اجراسی ایله برابر کؤچ، ایش سیزلیک و اکینچی لیگین آرادان گئتمه سی کیمی عامللری، مانعچی لیک تؤره ده جگینی بیلدیردیلر.
ملت وکیللری، اوزمانلار و مئدیالار طرفینده ایره لی سورولن بیر سیرا انتقادلار اثرینده اکمه مه طرحی یاخشی اکین طرحینه چئوریلدی. اکینچی لیگه ضرر وئرمه ین و اورموگؤلونه مرهم اولا بیلن بیر طرح.
جمهورباشقانلیغینین معاونی نین حضورو ایله قورولان جلسه ده بو طرح آراشدیریلدیقدان سونرا اجرا مرحله سینه سوروتلنه مه سی تکلیفی قبول اولوندو.
هر طرفلی اکینچی لیک طرحینین اجراسی، اؤلکه نین اولگوسو اولا بیلر
معصومه ابتکار، جمهورباشقانی نین معاونی و اؤلکه اطراف محیط قورومونون باشقانی اورمیه ده دئدی: هرطرفلی و دواملی اکینچی لیگین بیرینجی فازدا اورمو گؤلو سو حوضه سینین ۴۱ کندینده باشاریلی اجراسی، بو گؤلون جانلاندیرماسینا اومودلاری آرتیریب.
او اورمو گؤلو چئوره سی کندلی لرین دواملی بیلگی لندیرمکلرینی گرکلی اولدوغونو خاطرلاداراق، آرتیردی: بو طرح زامانا احتیاجی وار و عین حالدا تمل بیر طرح دیر و اؤلکه گئنلینده اولگو اولا بیلر.
ابتکار قویولاردان سو چکیلمه گین حجمی نین آزالدیلماسینداندا سؤز آچاراق،وورغولادی: سدلرین آرخاسیندا اولان سولاری بوراخما و ارخلر ایله چایلارین آریتداما ایشلری تالابلارین قورونماسی اوچون و اونون آردیجا اورمو گؤلونه فایدالی اولا بیلر.
او دئدی: اورمو گؤلو سو حوضه سینده یئر آلان تالابلار توریستی بیر فرصتدیلر و هر ایکی آذربایجان ولایتی اونلاردان استفاده ائدرک، اکینچی لیگین یئرینه یایا بیلرلر.
ابتکار سوندا کولتورل ایشلر ایله سووارما سیستمی نین اصلاح اولونماسینی ایسته یرک، خاطرلاتدی: اورمو گؤلونو جانلاندیرما، ملتین قاتیلیمی ایله حیاتا کئچیریله بیلر.
اکمه مه طرحینین اعتباری، سووارمادا یئنی سیستملره خرجلنه جک
قربانعلی سعادت غربی آذربایجان والی سی اکیلمه مه طرحینین اصلاحی اؤنریسینی ولایتین اورمو گؤلو قورومو طرفیندن اؤنریلدیگینی بیلدیره رک، دئدی: اکیلمه مه طرحینه وئریلن اعتبارلار یئنی سووارما سیستملرینه خرجلنه جک و بونلارین گئرچکشمه سی ایله گله جک ایللرده سنتی سووارما سیستمینده بؤیوک باشاریلار الده ائده جه ییک.
او آرتیریب: سپه لمه سووراما طرحی ده مدرن سووارما سیستمینین آیری یؤنتملریندندی و قصدیمیز وار اوندان بیر نمونه اجرا ائتمکله نتیجه سینی آراشدیراق.
غربی آذربایجان والی سی خاطرلاتدی: اعتبار سورونو ایله اوزلشدیکده، ولایتمیزین اورمو گؤلونو جانلاندیرما قورومو بو پروژه یه قاتیلا بیلر.
۴۵ مین هکتار اکین ساحه سی یئنی سووارما سیستملرینه چئوریله جک
هادی بهادری غربی آذربایجان والی لیگینین عمران ایشلری اوزره معاونی بونو دئیه رک کی زمانین تلف اولماسینا قارشی اولاراق، ۲۷ تصویب اولونموش اورموگؤلوجانلاندیرما برنامه لری اجرا اولونمادی، دئدی: اکیلمه مه طرحی یاخشی اکین طرحینه چئوریلدی و غربی آذربایجان طرفیندنده بیر سیرا اؤنریلر وئریلدی.
او سویا احتیاجی آز اولان محصوللاری اکمگی اؤنری وئردیکلرینی دئیه رک، آرتیردی: بو ایلین یاز اکینینده چوغوندور یئرینه بوغدا اکیلمه سینه و پاییز اکینینده ده آرپا ایله بوغدا استحصال اولونماسینا قرار وئریلدی و بو طرحلرده آرتیق قالان سولار اورمو گؤلونه گؤندریله جکدیر.
بهادری ۴۵ مین هکتار غربی و شرقی آذربایجان اراضی سینین اوچ ایل مدتینده یئنی سووارما سیستملرینه کئچمه سینی خاطرلاداراق، بیان ائتدی: هر ایل ۱۵ مین هکتار بو طرحین چرچیوه سینده چئوریلمه دیر.
