قطعه – قطعه جسمینه آیات قرآن آغلادی
گلدی عاشورا
گلدی عاشورا گینه یئر – گؤی بوتون قان آغلادی
قاره معجر چکدی هر کوچه – خیابان آغلادی
مرتضی اوغلو حسینین ماتمینده شیعه لر
یاس توتار ماتم قیلار قاره گئیه ر شیون ائلر
هر سحر- آخشام هر ائودن آه – واویلا گلر
ایندی هر مسجد اولوب بیر ماتمستان آغلادی
*****************************
بو نه طوفاندیر ایلاهی هر گلن قان آغلایار
یاحسین سسلر اوشاقلار ائیلر افغان آغلایار
اودلانیبدیر قلبلر آخشام – اوباشدان آغلایار
اولدو بو ماتملره هر سینه شان – شان آغلادی
*****************************
جمع اولارکن انبیا آچمیش بو گون یاس مکتبی
احمد مختاردان چونکی شهید اولموش صبی
یاس توتان آدم صفیدیر نوحه خوان نوح نبی
داوود آوازین کسیب سلطان سلیمان آغلادی
*****************************
حرمله آتدی اوخو سسلندی اوف – اوف تیر ده
شمر الینده گؤر نئجه قان آغلادی شمشیر ده
سیزلاییردی سجادین بوینونداکی زنجیر ده
شام خراب قالمیشدا هر بایقوشلو ویران آغلادی
*****************************
شاد اولوب سفیانیلر جشن ائیله دی آل یزید
خارجی اولدو حسین ایشکنجهسی اولدو شدید
گؤر مسلمان آدینا اونلار کیمی قیلدی شهید
بو مسلمان ظولمونه هر نامسلمان آغلادی
*****************************
ائتدیلر دعوت حسینی کوفی لر تزویر ایله
چیخدیلار لاکن سلامه قان ایچن شمشیر ایله
کیم گؤروب پئشواز اولونسون کؤرپه قانلی تیر ایله
بو مصیبتدن داحی هر آدی انسان آغلادی
*****************************
ای خیانت مظهری قیرخ اوزلو دینسیز کوفی لر
حشر اولونجا قارغیشا – نفرینه گلدیز کوفی لر
بیر نئجه شرم ائتمه دیز آللاهدان سیز کوفی لر
باغلانان مکتوبلاریزدا عهد – پیمان آغلادی
*****************************
کربلا ای کربلا قیلدین نه آل طاهایا
بیر بئله غارتلری سالدین نه آل طاهایا
آخرت یوردو آخر اولدون نه آل طاهایا
غبطه قیلدی داشینا لعل بدخشان آغلادی
*****************************
ای فراتین گور سویو آخدین نئجه دریایه سن
آل طاهانی سوسوز ییخدین نئجه صحرایه سن
آل طاهادان سورا باخدین نئجه دونیایه سن
گؤرمهدین معصوم اوشاقلار چؤلده عطشان آغلادی
*****************************
آلدی مشکی چیگنینه اوز قویدو دریا سمتینه
قیردی ظولمو حضرت عباس یار اولدو دینه
دولدوروب مشکی سوسوز دؤندو لبی عطشان یئنه
بیر بئله جومردلیگه دریای غلطان آغلادی
*****************************
ائتدیلر قولسوز حسینین تشنهلب سقّاسینی
سقّالیقدان قویدولار سقّا رشید عبّاسینی
سالدیلار آتدان یئره تا معرفت دریاسینی
قارداشیم وای سسلهینده قانلی میدان آغلادی
*****************************
ای حسین ای پاک قانیایله شانلی معراجه چیخان
ای آلیب قان دستمازین قانلی معراجه چیخان
ای آلیب جان آللاهیندان جانلی معراجه چیخان
معراج اوستونده ملکلر صف چکیب قان آغلادی
*****************************
ای یگانه جنگ ائدن مینلر قودورقان خصم ایله
ای اولان اسلامه ضامن بیر مبارک رسم ایله
ای ائدن قورآنی بیمه قطعه – قطعه جسم ایله
قطعه – قطعه جسمینه آیات قرآن آغلادی
*****************************
اولدو کؤنلوم بیر داها بیچاره زار و بینوا
گلدی ماتم فصلی گلدی بیر داها آه و نوا
قلبیمیزده آلدی یئر آلام شاه نینوا
گلدی عاشورا گینه یئر – گؤی بوتون قان آغلادی .
بهرام اسدی
