اوروم نیوز، بؤیوک آذربایجان شاعری و قیزیل عرفانین صاحبی اولان عمادالدین نسیمی نین اثرلری نشر ائدیلیب. “عمادالدین نسیمی (دیوانی)” آدلانان کتاب تدقیقاتچی بهرام اسدی طرفیندن حاضرلانیب.
بورادا داهی آذربایجان شاعرینین حیات و یارادیجیلیغی حاقیندا عمومی معلومات، غزللرینده ایشلتدیگی بعضی افاده‌لرین ایضاحلاری وئریلیب.
کتاب اورمیه شهرینده فعالیت گؤسترن “یاز” نشریاتیندا نفیس ترتیباتلا ایشیق اوزو گؤروب. یارادیجیلیغی ایله بشری قونولارا الوان رنگلر قاتان عمادالدین نسیمی تکجه آذربایجانین دگیل، دونیا پوئزییاسینین گؤرکملی نماینده لریندن ساییلیر. بو حاقی اونون یارادیجیلیغینا گتیرن بنزرسیز شعرلری و مدرک فیکیرلری دیر.
قئید ائتدیگیمیز کتاب ۵۶۸ صحیفه ده حاضرلانیب و نسیمی نین ایندیه دک چاپا حاضرلانان تورکجه دیوانلارینین ان مکملی دیر.
کتابی پست واسطه سی آلماق و یا ساتیش یئرلرینی اؤیرنمک اوچون، اوروم نیوز سایتی ایله ایلگی قورا بیلرسینیز.
