اوروم نیوز، «سئوگی یولچولاری» آدلی حیکایه توپلوسو حسین واحدی جینابلارینین ایلک کیتابی اولاراق، اورمیه ده حیکایه ساحه سینده اَن اؤنملی چاپ اولموش کیتابلاردان ساییلیر.
کیتابدا، سئوگی یولچولاری آدلی اوزون حیکایه ایله برابر بیر نئچه قیسا حیکایه ده یئرله شیب. سئوگی یولچولاریندا، یازار سئوگی بیر ماجرادان سؤز آچیب، وطن سئوداسی ایلا برابر آجیلی ـ شیرینلی خاطیره لردن و اولای لاردان دینیب دانیشیر.
سئوگی یولچوسو اولان یازار، یازدیغی سئوگی حیکایه سینده دویغوسال و صمیمی روحیاتین اوخوجولاری ایله پایلاشاراق آذربایجانیمیزین بیر چوخ عنعنه سین، گؤزللییین اوزه چکیب گؤستَریر. اورمونون گؤل اوستو مئیدانین، گمیچی نین سوواق داملارین، ناخچیوانین خاطیره لرله بویانمیش بازارین، یوکسک اووانین سازاقلی داغلارین و …
سئوگی یولچولاری ایله بوتون بو شهرلری ـ کندلری گزیب دولانساقدا، سئویب، سئودانی بیلمک ـ لبیندن شهد آلیب سورماق داها دا گؤزلدی.
حسین واحدی سئوگی حیکایه سینده بوتون بونلاری باجاردیغی قدر یازیب یاراتسادا یئری گلدیکده آیدین ایله سولماز آراسیندا اولان عاری ـ تمیز سئوگی آنلاری دا اونوتماییب. «اَسینتی دن آغاج یارپاقلارینین سسی، سؤزسوز گؤزل ماهنی یا چئوریلمیشدی. او دامین اوستونده یالقیزجا اوزانیب بو گؤزللیک لری ایزله ییردی. آیدینین باخیشلاریندان، سئوگی دامیردی»
«سولمازین، خوش باخیشلی قاپ ـ قارا گؤزلری، گؤزلرینین قاباغیندان آیریلماییردی. سولماز بوغدالارین یانیندا اوزانمیشدی، آیدین گؤردوگونو اینانمیردی ایکی سئوگی بیر ـ بیری قوجاقلادیلار. سولماز بیر داها سنی چوخ سئویرم، آیدین جانیم دئیردی»
سئوگی یولچولاری ایله یاناشی، اون یئدی قیسا مضمونلو حیکایه نی ده گؤروب اوخویا بیله ریک. یازارین بو حیکایه لری آرا- سیرا آذربایجان درگی لرینده چاپ اولسادا اونلاری بیر یئرده کیتاب اولاراق چاپ ائتمه یی باجارا بیلیب. واحدی نین قیساجا حیکایه لرینده اوشاقلیق نیسگیل لرین و حیس ائتدیی چتین آنلاری گؤروب اوخوساقدا، بونونلا برابر او چوخ بیلمیش قولویا تای طنز یازی لاریندا گولوشو اوخوجونون دوداغینا پای وئریر.
آنجاق، حسین واحدی ایلک کتابیندا الیندن گله نی اوخوجولاردان اسیرگه مه ییب، باجاردیغی سَویه ده بو حیکایه لری یازیب یاراتسادا، یئری گلدیکده بؤیوک اوستادلاریمیز اؤز فیکیرسؤزلری ایله اونا باشلادیغی بو یولدا یاردیم ائده بیلرلر.
واحدی جینابلاری ایلا جمعی بیر ایل یاخیندان تانیش اولسامدا اونون نه قدر انرژیک بیر انسان اولدوغون و آنادیلی و تورپاغینا بسله دییی حؤرمتی گؤروب اینانمیشام. قدیم آفتاب آذربایجان، آغری، شهامت، گلشن راز و … اونون بیر سیرا ایمضا آتدیغی درگی لردن ساییلیر و ایندیلیکده قیساجا حیکایه لری آردیجیل اولاراق آغری دا چاپ اولور.
واحدی جینابلارینا آنا دیلیمیز و نثریمیز ساری توتدوغو دوغرو یولدا داها آرتیق باشاریلار آرزیلاییریق.
«سئوگی یولچولاری» 1000 جیلدده اورمونون، یاز آدلی نشریاتی واسیطه سییله چاپا بوراخیلیب. کیتابین ساتیش دَیری ۳۰۰۰ تومن دیر.
بو کتابی پست واسطه سی ایله الده ائتمک و یا ساتیش یئرلرینی تانیماق اوچون، اوروم نیوز سایتی ایله ایلگی قورا بیلرسینیز.
