اوروم نیوز، مراغه-اورمیه دمیر یولونون انشاءات ایشلری ۸۰-جی ایلدن باشلانسادا، ۱۳ ایلین کئچمه سینه رغماً هله ده یاریمچلیق دیر. آما مسئوللار گرکلی اعتبارلارین وئریلمه سی ایله قارا ترنین ۹۳-جو ایلین سونونادک اورمیه ده گؤرمه سینی آرزی ائدیرلر.
اورمیه- ماراغا دمیر یولو بیر ملی طرح اولاراق، ۱۳۸۸-جی ایلده ایشلری قورتولمالی ایدی، آما بئش ایل بو زماندان کئچمه سینه رغماً هله ده یاریمچلیقدی.
اورمیه نی سراسری دمیر یولونا باغلاماق اوچون ایکی مین ۴۰۰ میلیارد ریال اعتبار لازمدی.
سید مسعود نصر آزادانی آلت یاپیلاری گئنیشلندیرمه و دوزلتمه شرکتینین دمیر یولو دوزلتمه و گئنیشلندیرمه معاونی دئدی: غربی آذربایجان دمیریولونون تکمیللشمه سینه احتیاج اولان بودجه وئریلیرسه، ایلین سونونادک ائده بیلریک بو پروژه نین آچیلیش مراسمینی گؤرک.
او بونو دئیه رک کی ایندی لیکده ایشلرده ۸۵% فیزیکی قاباغا گئتمه گی گؤرمک اولار، آرتیردی: ایکی مین ۴۰۰ میلیارد ریالین وئریلمه سی ایله بیر ایله بو پروژه نین ایشلری ده بیتر.
آزادانی وورغولادی: سولدوزا قدر پروژه نی تکمیللندیرمکده ۶۰۰ میلیاردریال اعتباردان یالنیز ۱۵% اختصاص تاپیبدیر.
او خاطرلاتدی: غربی آذربایجان مسئوللاری مشکللری و مانعلری آرادان قالدیرماق اوچون ایش بیلگی ائتسه لر داها قیسا زاماندا بو ایش سونا چاتار.
۹۳-جو ایلین سونوندا اورمیه یه قاطار گله جک
علی نوزاد یول و شهرسالما باخانینین معاونی ده بو ایلین مرداد آییندا اورمیه-تبریز اتوبانینین انشاءات ایشلری اوزره آپاردیغی گؤروشده، بو یولون ایشیقلاندیرما سیستمی نین ۲۴ کیلومتر مسافه سینه ۲۰ میلیاردریال آییراجاقلارینی بیلدیردی.
او بو طرحین آپاریجی شرکتی ایله گئرچکلشدیردیگی اورتاق اوتورومدا آرتیردی: بو پروژه خصوصی بخش و یاتیریمجی لارین یاردیمی ایله اجرا اولونور.
یول و شهرسالما باخانینین معاونی بو گؤروشدن قاباقد نقده دمیریولونون دوراغیندانا گئتمیش و اورانین ۷۴% ایشلرینین بیتمه سینین شاهدی اولموشدور و ائله اورادا دئمیشدی: بو پروژه ایلین سونونادک ایشه باشلایاجاق.
او ها بئله اورمیه یه ائتدگی بیرگونلوک سفری سیراسیندا، قاتارین بو ایلین سونونادک اورمیه دوراغیندا دوردوغونو بیان ائتمیشدی.
اورمیه دمیر یولونون ۸۵% فیزیکی ایلرلمه سی وار
غربی آذربایجان یول و شهرسالما اداره سینین رئیسی دئدی: ایندیه دک ۲۴۵ میلیارد اورمیه دمیر یولو اوچون خرجله نیب و ۳۴۵ میلیاردادا احتیاجیمیز وار.
خلیل محبت خواه اوروم نیوز مخبری ایله دانیشیقدا دئییب: بو پروژه ۸۵ % ایلرلمه سی وار.
او خاطرلاتدی: دمیر یولو ماراغادان باشلانیر و ملکان، میانداب، مهاباد و نقده دن کئچه رک اورمویا چاتیر.
محب خواه آرتیردی: ایندی لیکده ۲۷ میلیارد بو پروژه لری اجرا ائدن شرکتلره بورجلویوق و بو ایللیکده ۶۰ میلیاردتومنین وئریلمه سی ایله برابر چوخلو ایشلر گؤرمک اولار.
او بونا اشاره ائدرک کی ایسته نیلن اعتبارلار وئریلیرسه ایلین سونونادک قاتاری اورمیه ده گؤره جه ییک.
دمیر یولونون ایشه دوشمه سی، غربی آذربایجانلیلارین ان اؤنملی ایستگی
هادی بهادری اولاشیم آلت یاپیلاری گئنیشلندیرمه و دوزلتمه شرکتینین معاونی ایله گؤروشده دئدی: تأسفله اون ایلدن چوخدور کی ماراغا –اورمیه یولو پروژه سی باشلادیلیبدیر. آما هله لیک بیتمه ییب و بو پروژه نین ایشه دوشمه سی غربی آذربایجانلیلارین ان بؤیوک ایستکلریندن بیری دی.
غربی آذربایجان والی سینین عمران و انشاءات ایشلری اوزره معاونی آرتیردی: دمیر یولو بؤلگه میزین قالخینماسیندا اؤنملی رول اوینایاجاقدیر.
او بئش گؤمروک منطقه سینین چالیشماسینی ولایتیمیزین نه قدر بین الخالق تجارت جهتدن اؤنملی اولدوغو یئره اشاره ائدرک، وورغولادی: تدبیر و امید دولتینین گلمه سی ایله غربی آذربایجان مسئوللاری بو ملی پروژه نین بیتمه سینه گرکلی آددیملاری آتماقدادیرلار.
