اوروم نیوز، حجت الاسلام والمسلمین قهرمانی مخبریمیزله خصوصی دانیشیقدا دئدی: عالی مقاملی رهبریمیزه تای، دونیانین هئچ بیر یئرینده لیدر و رهبر یوخوموزدو.
او تورکیه نین جمهورباشقانی رجب طیب اردوغانین رهبریمیزه قارشی ائتدیگی بیاناتا توخوناراق، آرتیردی: سیاست عالمینده بیر سیرا انسانلار اؤزلوکلرینی ایتیره رک، فکر ائدیرلر کی گونشین اؤنونو آلا بیله جکلر.
غربی آذربایجان علمیه حوزه لرینین رئیسی وورغولادی: عالی مقام رهبریمیز بیر شخصیتدیر کی دونیا سیاستچی لری و ضیالی لاری اونون مدیریتی، شایسته لیگی و مختلف بین الخالق عرصه لرده تأثیرلی اولدوغونا اعتراف ائدیرلر.
او بیان ائتدی: اؤلکه میزین و اؤزللیکله ده ولایتیمیزین مئدیالاری و رسانه لری بو خصوصدا اورتایا گیرمه لی و منطقی، عاقلانه و عالمانه یوللارلا گئرکن جوابی وئرمه لی دیلر.
قهرمانی بونو قئید ائدرک کی مسلمان سنی لرده رهبریمیزین اؤندرلیگینی قبول ائدیرلر دئدی: عالی مقاملی رهبریمیزین اخلاقی، اجتماعی،انسانی، اسلامی و سیاسی تفکرونو کندیسینه ائدیلن حاقسیزلیغین قارشیندا مدافعه ائتمه لی ییک.
غربی آذربایجان علمیه حوزه لرینین رئیسی سوندا خاطرلاتدی: رهبریمیزین فضیلتلرینی بوتون دونیا درک ائدیب و اردوغان بیر سیاست آدامی اولاراق بونو تحمل ائده بیلمه ییر.
