تازا مود!+ طنز شعر

    تازا مود!

حسین سنجیده

تازا موددی بعضی جاوان

چیگنی اوسته تئل اوینادیر

دده دئییر گئت اصلاحا

دوداق بوزوز دیل اوینادیر

قاشلارینی آلدیرالی

یاناقینا قویور خالی

هئچ قیزلاردان قالمیر دالی

عشوه ساتیر فئل اوینادیر

تکمیل ائلیر آرایشی

ارکک دؤنوب اولور دیشی

سئومه سه ده او ورزشی

گیزلینده گاه میل اوینادیر

اوغلان دئمه چون عکسی دی

یا حشیشی یا اکسی دی

پارتی لارین خوش رقصی دی

بیریک وورور بئل اوینادیر

قیزدا سئویر پیس پبس هله

گونده بیرین سالیر اله

قاش گؤز آتیر گوله-گوله

اوز تایی بیر خُل اوینادیر

اگنینده بیر قیز کؤینگی

گؤزده قارا شیک عینکی

دویونجا تاپمیر چوره گی

الده (ایرانسل) اوینادیر!

دیپلم آلیب قالیب بئکار

بوللو هنر الینده وار

افیون،چاخیر بیرده سیغار

اؤز باشیندا کول اوینادیر

بعضی جوان نه دن قالمیر

اوز اوزون ده ن هئچ اوتانمیر

اوز حالینا اوزو یانمیر

عؤمور اوسته یئل اوینادیر