اوروم نیوز، اورموگؤلونون سویونون اولکی وضعیته گتیریلمه‌سی اوچون ایران مختلف اؤلکه‌لردن اولان علم آداملارینین اشتراکی و مصلحتی ایله تکلیفلر پاکئتی حاضیرلاییب. تکلیفلر پاکئتینده نظرده توتولان ایشلرین حیاتا کئچیریلمه‌سی ایله ۱۰ ایل عرضینده گؤل اولکی سویییه‌یه قایتاریلا بیلر.
ترئند خبر آژانسینین معلوماتینا گؤره، بو سؤزلری ایرانین غربی آذربایجان ولایتنین باشچی سی قر بانعلی سعادت بو اؤلکه‌ده سفرده اولان آذربایجانلی ژورنالیستلرله گؤروشونده دئییب.
قئید ائدک کی، اورموگؤلونون ساحه سی تخمیناً ۶ مین کیلومترمربعدیر. کؤچری قوشلار مهاجرت زامانی بو گؤلدن فاصله منطقه سی کیمی استفاده ائدیر. فاصله‌سیز قوراقلیق سببیندن اورمو گؤلو تدریجاً دایازلاشیر، ساحه سی ایسه آزالیر. بو ایسه تکجه بیتکی لره دگیل، حیوانلارا دا تأثیر گؤستریر.
سعادت بیلدیریب کی، جمهورباشقانی حسن روحانی نین گؤستریشی ایله باخانلار کابینئتینده اورمو گؤلو ایله باغلی قرار قبول اولونوب و اورمو گؤلونون اولکی وضعیتینه قایتاریلماسی ایله باغلی قرارگاه یارادیلیب: “آرال دنیزی ده قوروموشدو و اونون اولکی وضعیتینه قایتاریلماسی اوچون روسیه، کانادا، ژاپن، آمریکل، او جومله‌دن آوروپا اؤلکه‌لری و هیندیستاندان اولان عالملر ایش آپارمیشدیلار. ایراندا یارادیلمیش قرارگاه اونلارین هامیسینی اؤلکه‌یه دعوت ائدیب فیکیرلرینی اؤیرندی. اونلارلا اورمیه ده بیر نئچه گؤروشوموز اولدو. اونلارین تجربه لری و فیکیرلرینی اؤیرندیک. داها سونرا ۶ آی عرضینده همین توصیه لر اساسیندا تکلیفلر پاکتی حاضیرلاندی”.
والی دئییب کی، تکلیفلر پاکتی ۲۵ ماده‌دن عبارتدیر، هر ماده اؤزو لایحه اولاراق بندلره بؤلونور: “حاضردا بیز همین تکلیفلر پاکتی چرچیوه‌سینده بیر نئچه لایحه‌نین اجراسی اوچون وسائط آییرمیشیق و ایشلره باشلامیشیق. لایحه‌یه اساساً، گؤلون اطرافینداکی کند تصروفاتی سیستمینده اصلاحاتلار آپاریلمالی و عنعنه وی سووارما سیستئمیندن ثمره لی و علمی سووارما سیستمینه کئچمه‌لی ییک. بوندان باشقا، گؤلون اطرافیندا کیچیک گؤلمه چه لر و سو منبعلری وار کی، بیز چالیشیریق اونلاری دا گؤله استقامتلندیرک. بو دا گؤلون برپا اولونماسینا کؤمک ائده‌جک”.
اونون سؤزلرینه گؤره، ایران حکومتی اورمو گؤلونده بو ایشلره ۱۴ میلیارد ریال وسائط آییریب: “بو وسایطین بیر حصه سی شرقی، دیگر حصه سی غربی آذربایجان، بیر حصه سی ایسه کوردوستاندا گؤرولن ایشلره صرف ائدیله‌جک”.
سعادت آراز چایی و خزر دنیزیندن اورمو گؤلونه سویون آخیدیلماسی لایحه‌سینین اجراسی اوچون آراشدیرما آپاریلدیغینی دا بیلدیریب: “اولجه معین اولونمالی دیر کی، بو سولارین ترکیبی نئجه‌دیر. خزر دنیزینین سویونون ترکیبینده سولفات اوستونلوک تشکیل ائدیر، لاکن اورمو گؤلونون سویونون ترکیبینده ناتریوم-خلورید اوستونلوک تشکیل ائدیر. بونلار بیرلشرسه، داها بؤیوک پروبلئملر یارانا بیلر. همچنین خزر دنیزی و آراز چایی بین الخالق سو حوضه سی اولدوغوندان بو مسئله علاوه مذاکره‌لر طلب ائدیر. هله‌لیک بو، آراشدیریلیر و آچیق و آیدین قرار وئریلمه‌ییب”.
قئید ائدک کی، ۲۰۱۳-جو ایلین اییول آییندا ایراندا آراز چاییندان اورمو گؤلونه سویون آخیدیلماسی لایحه نین اجراسی اوچون خارجی اینوئستورلا ۸۷۵ میلیون آورو دگرینده مقاوله امضالاییب. لایحه‌یه اساساً، آراز چایینین سویونون جلفا، مرند، شبستر و تبریز چؤللرینه آخیدیلماسی نظرده توتولوب. لایحه چرچیوه‌سینده ۸ شهر و ۸۱ کندین ایچمه‌لی سو پروبلئمی اؤز حلینی تاپاجاق.
