اوروم نیوز،اسلامین اولینده، عدالت و آزادلیغین تملینی آتان سون پیغمبرین (ص) اؤلوموندن سونرا بنی امیه نین یاراتدیغی تحریفلرین نتیجه سی اولاراق اسلامین ظالملرین بوغازیندا یویولماسی و عدالتین فاسقلرین آیاقلاری آلتیندا یوخ اولماسینا آز قالمیشکن سیدالشهدا (ع) بؤیوک “عاشورا” حرکاتینی باشلاتدی.
یئزیدیلرین ظالم حکومتینین اسلامین نورانی چهرهسی اوزرینه قیرمیزی خط چکرک، اسلامین بؤیوک پیغمبری (ص) و ایلک نسل مسلمانلارین تحمل ائدیلمز زحمتلرینی و فداکار شهیدلرین قانینی هئچه ائندیرمهسینه آز قالمیشدیر.
اسلام مکتبی، کئچمیش جاهلیت دؤورونون قالیقلارینی، ملیتچی لیگی و پان عربیزمی دیرچلتمک اوچون قورولموش پلانلار و “لا خبرون جاء و لا وحیون نازئل” (“نه بیر خبر گلدی و نه بیر وحی نازل اولدو”) شعارلاری ایله محو ائدیلیب یوخ ائدیلرک، اسلامین عدالت حکومتیندن بیر “شاهنشاهلیق” دوزلدیلمهسینه بئله جه ده اسلامی و وحی انزوایا چکمگه بیر شئی قالمامیشکن، هئچ کیمین گؤزلمهدیگی بیر آندا الهی وحی ایله بسلهنیب پیغمبرلرین سید محمد مصطفی (ص) و ولی لرین آغاسی علی مرتضی (ع)- ین ائولرینده تربیه گؤرموش اولان، صدیقه طاهر (س)- ین قوجاغیندا بؤیوین بؤیوک بیر شخصیت قیام ائدهرک اؤز نمونهسیز فداکارلیغی و ایلاهی حرکاتی ایلا بؤیوک بیر حادثه نی مئیدانا گتیردی.
“ لعبت هاشم بالملک فلاخبر جاء ولا وحی نزل”
(بنی هاشم قبیلهسی سلطنت ایله اوینادی، بئله ایسه نه بیر خبر گلدی، نه بیر وحی نازل اولدو)
یئزید (آللاهین لعنتی اوزرینه اولسون) اهل بیت قادینلارینی شامدا یانینا گتیردیکلری زامان، چوبوقلا اباعبداللاهین موبارک باشینداکی پاک دیشلرینی ووروردو و شعر اوخویوردو.
بنی امیه اسلامی اورتادان قالدیرماغی اؤزونه مقصد قویموشدور. بنی امیهنین یوزلاشمیش رژیمی اسلامی طاغوتی بیر دیکتاتورلوغا چئویرمکله، بونونلا اسلامین قوروجوسونون سیماسینی تحریف ائدیردی. چنگیز ایرانا نه ائتدیسه معاویه و ستمکار اوغلو رسول اللهین (ص) خلیفهسی آدی آلتیندا گیزلنهرک اسلاما عینی سینی ائتدیلر. وحی مکتبینین اساسینی اونلار شیطانی بیر رژیمله عوضلهدیلر.
حضرت سیدالشهدا (ع)، معاویه و اوغلونون (آللاه لعنت ائتسین!) اسلام مکتبینی محوه سوروکلهدیکلرینی و اسلامین عکسینی گؤسترمگه چالیشدیقلارینی گؤردو. اسلام انسانی تربیه ائدیب کامالا چاتدیرماق اوچون گلمیشدیر، وار-دولت ییغماق اوچون گلمهمیشدیر. بونلار، بو آتا و اوغول ایسه، عینیلیکله بیزیم آتا و اوغول رضا خان و محمد رضا شاه کیمی اسلامی عکسیندن گؤستریردیلر. اونلار شراب ایچیردیلر و عینی زاماندا جماعات نامازیندا اماملیق ائدیردیلر. اونلار تشکیل ائتدیکلری پوزغونلوق مجلسلرینده عیش-عیشرتله مشغول اولوردولار، هر شئی وار ایدی او مجلسلرده! جماعات ایسه اونلارین آردینجا گئدیردی، چونکی اونلار امام ایدیلر. بو نه امام-جماعاتدیر کی، شراب ایچیر و قومار اویناییر؟! اونلار منبره چیخیردیلار و موعظه سؤیلهییردیلر. منبره چیخیردیلار رسول اللهین (ص) خلیفهسی آدی ایله، حال بوکی اونون علیهینه قیام ائتمیشدیلر. شعاری “لا اله الی الله” ایدی، آما توحیده قارشی قیام ائتمیشدیلر. عمللری، داورانیشلاری شیطانجا، آنجاق شعارلاری رسول اللهین (ص) شعارلاری ایدی.
یزید اقتدار صاحبلی بیر سلطان ایدی. اوندا دیکتاتورا خاص اولان بوتون خصوصیتلر وار ایدی و معاویهدن سونرا او تک باشینا حکمدارلیق ائدیردی.
حضرت سیدالشهدا (ع) هانسی دلیل ایله “آللاهین کؤلگهسی” اولان عصرین سولطانینا قارشی گئتمیشدیر؟ آخی “سولطانا ال وورماق اولماز!”. آما او عصرینین سولطانی ایله قارشی-قارشیا گلدی! عصرین سلطانی کلمه شهادت گتیریر و دئییردی کی، “من پیغمبرین خلیفه سی یم”. حال بوکی او اصلینده قانونسوز یوللا خلافته یئیه لنمیشدیر. اصلینده بو آدام خالقی قارت و استثمار ائتمک، اونون مالینی ایسه اؤزو و طرفدارلاری آراسیندا بؤلوشتورمک ایسته ییردی.
سلطنت و ولیعهدلیک (پادشاهلیق) باطل و اوغورسوز بیر حکومت طرزی دیر. حضرت سیدالشهدا (ع) بو سیستئمه بویون اَگمهمک اوچون قیام ائتدی و شهید اولدو. یئزیدین ولیعهدلیگی آلتینا گیرمهمک و اونون سلطنتینی رسمی اولاراق تانیماماق اوچون بونو ائتدی و بوتون مسلمانلاری قیاما چاغیردی. بئله حکومتلر اسلامدان دگیلدیر. اسلامین سلطنت و ولیعهدلیگی یوخدور.
معاویه و یزیدین اسلام اوزرینده اولان تهلوکهلری فقط خلافتین غصب ائدیلمهسی دگیلدی. بو هله ان کیچیک تهلوکه ایدی. اونلارین اساس تهلوکهسی اسلامی بیر مونارخیایا، نسیلدن نسیله کئچن سلطنته چئویرمک ایستمهلرینده ایدی. معنویاتی طاغوتی بیر شکله بوروندورمک ایستهییردیلر. بونو دا “بیز آللاه رسولونون خلیفه سی ییک” ،آدی آلتیندا ائدیردیلر و اسلامی بیر طاغوت رژیمینه دؤنوشدوروردولر. بونلار، او ایکی آدامین، اسلاما وئرمک ایستهدیکلری و یا وئردیکلری ضررلر ایچینده ان اؤنملیسی ایدی. اؤنجهکی لر او قدر ضرر وئرمهدیلر. اونلار اسلامین اساس تمللرینی ترسینه چئویرمک ایستهییردیلر. مگر آللاه رسولونون خلیفه سی مجلسده شراب ایچر و قومار اوینایار؟ مگر او مونارخ اولا بیلر؟ آما یئنه ده آللاه رسولونون بو “خلیفهسی” نامازا گئدیر و جماعات نامازی قیلدیریر! بو تهلوکه اسلام اوچون بؤیوک بیر تهلوکه ایدی. و محض بو تهلوکهنی سید-الشهدا (ع) آرادان قالدیردی. سیدالشهدانین قیامی، طاغوت سلطنتینه قارشی ایدی. طاغوت سلطنتی اسلامی چئویرمک ایستهدیکلری رنگه اگر چئویرمگی باجارا بیلسه ایدی، اسلام تمامیله باشقا بیر شئی اولاردی. بیزده کی کیمی ۲۵۰۰ ایللیک سلطنتینه بنزه ییردی. هرچند اسلام گلمیشدی کی، سلطنت رژیمینی و بونا اوخشار رژیملری یوخ ائدیب، دونیادا ایلاهی بیر حکومتی قورسون. طاغوتو ییخاراق، اونون یئرینه آللاهی گتیرسین . عین ایله جاهلیت مسئلهلری و کئچمیش مسئلهلر. سیدالشهدانین اؤلدورولمهسی مغلوبیت دگیلدی. چونکو او قیام آللاه قیامی ایدی و آللاه قیامیندا مغلوبیت یوخدور.
بنی امیه اسلامین اصلینی یوخ ائدهرک، بیر عرب دولتی قورماق ایستهییردی. بو ایشلر عرب، غیرعرب، فارس و دیگر مسلمانلارین دقتلرینی جلب ائتمهلرینه سبب اولدو. و اونلار مسئله نین عربلر، غیر عربلر، فارسلار و دیگر ملتلر یوخ، آللاه و اسلام اولدوغونو آنلادیلار.
سیدالشهدا (ع) اموی لرین اسلام خلافتی آلتیندا گیزلنهرک، اسلام مکتبینه ضد ایشلر تؤرتدیکلرینی و ظلم ائتدیکلرینی، بونوندا دونیایا “آللاه رسولونون خلیفهسی بو ایشلری ائدیر” ،دئیه یاییملادیغینی گؤردو و بو زامان او لازم گلرسه اؤلمگی، آنجاق معاویه و اوغلونون فسادلارینی یوخ ائتمگی، اؤزو اوچون مقصد بیلدی.
حضرت سیدالشهدا (ع) گوجلو و عینی زاماندا اسلامی اولدوغونو آچیقلایان یزیدین زورباچی حکومتی قارشی سیندا آز قوه ایله حرکات ائتدی. اؤزو، یاخینلاری و قوموندن ده اونلاردا وار ایدی. یزید حکومتینین اسلامی اولماسینی ادیعا ائتمهسین، اؤزونو ایسه آللاه رسولونون خلیفهسی حساب ائتمهسینه رغماً، او مملکتین قانونلارینا حاقسیز یئره مسلط اولموش، ظالم بیر آدام ایدی. حضرت ابا عبدالله (ع) آز مقدار انسانلا بئله یزیدین قارشی سیندا حرکاتا کئچیب، قیام ائتمگی، اونو ایشدن کنارلاشدیرماغی و نهی از منکری یئرینه یئتیرمگی اؤزونه وظیفه بیلیب.
سیدالشهدا (ع)، ظالم و زوربا بیر حکمدارین خالق ایچینده حکم یوروتدوگونو گؤردوکده، آچیقجا ظالم بیر حکمدارین خالق آراسیندا حکومت ائدهرک خالقا ظلم ائتدیگینی گؤرن بیر کیمسهنین، اونون قارشی سیندا آدام و یا آداملارلا هر نه قدر باجارا بیلیرسه دورماسینی و او بؤیوک عمومی اوردونون انگللنمهسینین واجبلیگینی بیان ائدیر: “هر کس آللاهین حرام ائتدیکلرینی حلال بیلن، آللاهین دینینی پوزان، آللاهین بندهلرینه ظلم ائدن ظالم رهبری گؤروب، سؤزو و عمللری ایله اونا قارشی چیخماسا، آللاه-تعالا قیامت گونو اونو همین ظالمین طالعینه دچار ائدهجکدیر.”
یزید ظاهری حساب اوزریندن باخیلدیقدا دیندار بیر آداما بنزهییردی. اؤزونو پیغمبرین (ص) خلیفهسی حساب ائدیر، ناماز قیلیر و بیزیم ائتدیگیمیز ایشلرین هامی سینی او دا ائدیردی. آما نئجه ائدیردی؟ حال بوکی دیگر طرفدن او عصیانکار ایدی و آللاه رسولونون سنتینه مخالفلیک ائدیردی. آللاه رسولونون سنتینه گؤره خالق ایله یاخشی رفتار ائدیلمهسی گرکدیر، او ترسینه عمل ائدیردی. مسلمانلارین قانینین قورونماسی گرکدیر، مسلمانلارین قانینی تؤکوردو. مسلمانلارین مالینین هدر ائدیلمهمهسی گرکدیر، او مسلمانلارین مالینی هدر ائدیردی. آتاسی معاویهده بولونان اداره اصولونون عینیسینه صاحب ایدی. نیتئکیم مؤمنلرین امیری (ع) اونون قارشیسیندا قیام ائتدی. آنجاق حضرت علی (ع)- ین اوردوسو وار ایدی، سیدالشهدا (ع) ایسه چوخ آز سایدا آداملا بیر سوپر گوجون قارشیسیندا ایدی.
اسلامین چهرهسینه بیر ضررین وئریلمک ایسته نیلدیگی گون، اسلام بؤیوکلرینین جانلارینی اونون اوچون وئردیکلری گوندور. معاویه و اوغلونون خلافتلری زامانیندا مسئله بئله ایدی کی، اونلار اسلامین چهرهسینی چیرکینلشدیردیلر. مسلمانلارین خلیفهسی آدی ایله، آللاه رسولونون خلیفهسی آدی ایله او جنایتلری تؤرهدیردیلر. مجلسلری نه مجلسلری ایدی! بئله شرایطده اسلام بؤیوکلرینین مقدس بورجو اونلاری وضعیتی دگیشمک اوچون مجادله آپارماغا مجبور ائدیردی. خلیفهلرین اسلامین چهرهسینی چیرکین گؤسترمهلری، خبرسیز غافل کیمسهلرین اسلام خلافتینین معاویه و یزیدین صاحب اولدوقلاری خلافت اولدوغونو گومان ائتمهلرینه گتیریب چیخارا بیلردی. اسلاما تهلوکهلی اولان دا بودور و بونا گؤره ده اؤلوم ریسکی آلتیندا اولسا بئله، اسلام اوغروندا مجادله آپارماق گرکدیر.
