اوروم نیوز، اؤلکه میز ایرانین تاریخینده یئنی بیر ایسلام انقلابی آدیندا گؤزل بیر صحیفه آچیلدی. بو صحیفه نی اؤلکه میزین قورخماز و آسلان جینسیندن اولان ایگید لریمیز آچدیلار. صحیفه نی ساخلاماق اوچون ده آسلان اینسانلار ایسته ییردی و انقلابدا بئله بیر آسلان لار چوخویدورلار. بونلارین لاپ بؤیوک اینسانلاریندان بیری رحمتلیک «شهید باکری»-دیر.
عشقی، کیشیلییی، ایمانی، عزتی و شرفی باشاران بیر کیشی و او، عشق سرداری اولدو، بو عشق وطن و ایسلام عشیقیدیر.
شهید باکری، ۱۳۳۳ ه. ش ایلینده قوشاچای (میاندوآب) شهرینده، مذهبی بیر عاییله ده دونیایا گؤز آچدی. اوشاق اولار کن، عزیز و ایمانلی آناسینی الدن وئردی و بو اونون اوچون آغیر بیر یاشاییش باشلانیشی اولدو. ابتدایی و اورتا تحصیلاتینی، اورمیه شهرینده قورتاریب، قارداشی «علی باکری»-نی ساواک لار شهید ائتدییی اوچون، سیاست جریانلارینا آیاق قویدو. سردار دیپلم آلاندان سونرا، قارداشینین اؤلوموندن اوزلودوغو حالدا، بیلیم یوردودا(دانشگاه دا) میکانیکلیغه قبول اولدو. او تبریز بیلیم یوردوندا اولدوغو زامانا کیمین، اورانین لاپ چالیشقان انقلاب مبارزلریندنیدی.
او سربازلیق دؤورانیندادا امام خمینی(ره) حضرتلرینین بیلدیریشیندن (اعلامیه سیندن) تبعیت ائدرک، ساخلوو (پادگان)-دان گیزلیجه قاچدی و انقلاب یولوندا چوخلو فعالیت لر گؤردو.
ایسلامی انقلاب اله گلندن سونرا سپاه-پاسداران یاراندیغی زامان اورا عضو اولوب، اورمیه سپاهینین گوجلنمه سینه گؤره چوخ چالیشیب، زحمت لر چکدی. اوندان سونرا ضرورته گؤره اورمیه محکمه سینه گئدیب اورادادا فعالیت ائتدی. سپاهدا اولدوغو حالدا ۹ آیا کیمین اورمیه نین شهرداری اولوب مهم و ده یرلی ایشلر گؤردو. شهیدین ائولنمه سی، تحمیلی ساواشینین باشلانماسیلا برابریدی. خانیمینین کبینی (مهریه سی) اونون کلت اسلحه سیدی. ایکی گون کبین کسیلندن سونرا جبهه یه گئتدی. ایکی آیدان سونرا شهرین مصلحتی اوچون قاییدیب جهاد سازندگی مسئولو اولوب یئنه ده لاپ ده یرلی ایشلر خالقا گؤردو. او اورمیه سپاهینین عملیات باشچیسی مسئولو اولدوغو زاماندا بؤلگه ده امنیت یاراتماق و شرق و غرب موزدورلارینی بوردان تمیزلمکده گئجه-گوندوز ایشله ییب زحمت لر چکدی.
او جیبهه ده فتح المبین عملیاتیندا، نجف اشرف تیپینین معاوینی اولان زامان بعثی رئژیمله مقابله ده گؤز ناحیه سیندن یارالاندی. اوندان سونرا، بیت المقدس، رمضان، مسلم ابن عقیل، مقدماتی والفجر، بیردن دؤرده کیمی والفجر عملیاتی و خیبر عملیاتیندا مختلف سیمت لرده بوتون عشق ایله ایسلامی اؤلکه میزدن دفاع ائتدی. نئچه گون «بدر» عملیاتینا قالان بؤیوک انقلاب رهبری، امام خمینی (ره)-نین گؤروشونه گئدیب، آغلایا-آغلایا ایمامدان شهید اولماسی اوچون دوعا ائتمک ایسته میشدی. عشق سرداری سونوندا آرزیسینا یئتیشدی و پیری ندن حاجتین آلدی و ۱۳۶۳–نجی ایلین بهمن آیینین ۲۵–نده بدر عملیاتیندا، عاشورا لشگرینین فرماندهی اولاراق، ملاکه لر قانادلارین اونا طرف آچیب، تانری اونو اؤزونه ساری چاغیردی.
روحو شاد اولسون/یازان: حسین واحدی/ خاطره لر دوراغی بلوقو/
