اوروم نیوز، ایران اسلام شوراسی مجلسینین ملی تهلوکه سیزلیک و خارجی سیاست کمسیونونون صدری دئییب: ایرانلا ۵+۱ قروپو آراسیندا مذاکره لرین یئکون نتیجه سی و آنلاشما ایران اسلام جمهوریتینین ملی منافعی استقامتینده اؤنملی آددیم اولا بیلر.
ایرنانین معلوماتینا گؤره، علاء الدین بروجردی شنبه گونو ژورنالیستلره وئردیگی مصاحبه ده ایران خارجی ایشلر باخانی محمد جواد ظریفین پارلامئنتین غیرعلنی اجلاسینداکی اشتراکینا توخوناراق، علاوه ائدیب: نووه مذاکره لرینده مناسب نتیجه یه چاتماق اوچون آمئریکالیلار چوخلو آددیملار آتمالی، دیگر طرفدن ده اؤز تاماهکارلیقلاریندان ال چکمه لی دیرلر.
نووه مذاکره لرینده یئکون نتیجه نین الده اولونماسینی ایرانین نووه مذاکره چی کومانداسینین تهرانین پرینسیپیال موقعلری اوزرینده دایانماسینین گؤستری جیسی آدلاندیران بروجردی دئییب: ایرانین مذاکره کومانداسینین سعیی آلقیشا لایقدیر. لاکن تعیین اولونموش زاماندا نتیجه نین الده اولونماماسینین اساس عاملی، آمریکانین تاماهکارلیغی ایدی.
ایران اسلام شوراسی مجلسینین عضوو همچنین بیلدیریب: اگر مذاکره لر نتیجه یه چاتمازسا، مطلق غلبه ایرانلادیر. چونکو اوندان سونرا تهرانین ژنو آنلاشماسینین مادهلرینی اجرا ائتمکده عهده لیگی اولمایاجاق .
