اوروم نیوز، قوشولماما حرکاتی نووه سلاحلارینین یاییلماسینی قاداغان ائدن ان پی تی پروتوکولونون اجراسی و بیرلشمیش ملتلر تشکیلاتی نین تهلوکه‌سیزلیک شوراسینین ایرانلا باغلی قطعنامه‌لری ایله باغلی آتوم انرژیسی اوزره بین الخالق آژانسین دیرئکتورلار شوراسینین ویانادا کئچیریلن اجلاسیندا بیر بیانات یایاراق، بیلدیریب کی، قوشولماما حرکاتی بوتون اؤلکه‌لرین نووه انرژی سیندن دینج مقصدلر اوچون استفاده اوزره قانونی و انکار ائدیلمز حاقینا تأکید ائده‌رک، بو خصوصدا هئچ بیر آیری-سئچکیلیک اولمادان قانون و عهده لیکلر اساسیندا رفتارین ائدیلمه‌سینی وورغولاییب.
ایرانین اتوم انرژیسی اوزره بین الخالق آژانسداکی نماینده‌سی رضا نجفی طرفیندن قرائت ائدیلن بو بیاناتدا دئییلیر: قوشولماما حرکاتی آتوم انرژی سی اوزره بین الخالق آزانسی نووه فعالیتلرینه نظارت اوزره یگانه صلاحیتلی قوروم حساب ائده‌رک، آژانسین فعالیتلرینه خصوصیله ده نووه فعالیتلرینه نظارتله باغلی ایشلرینه کنار و یئرسیز مداخیله‌نین قبول ائدیلمز اولدوغونو وورغولاییر.
قوشولماما حرکاتی همچنین، یاخین شرقین نووه سلاحلاریندان تمیزلنمه‌سی مسئله سینی دونیانین نووه سلاحلاریندان تمیزلنمه سی استقامتینده آتیلمیش مثبت بیر آددیم حساب ائده‌رک، بیرلشمیش ملتلر تشکیلاتی و تهلوکه سیزلیک شوراسینین علاقه دار قطعنامه‌لری اساسیندا یاخین شرقین نووه سلحهلاریندان تمیزلنمه‌سینه تأکید ائدیر.
قوشولماما حرکاتی دینج مقصدلره خدمت ائدن نووه فعالیتلرینین توخونولمازلیغینا دا تکید ائده‌رک، دینج مقصدلره خیدمت ائدن نووه تأسیساتلارینا قارشی ایسته‌نیلن هجوم و یا تهدیدی بین الخالق قانونلارا، بیرلشمیش تشکلاتین نظامنامه سینه و آتوم انرژیسی اوزره بین الخالق آگئنتلیگین قانونلارینا ضد حرکت حساب ائدیر. عینی زاماندا بو کیمی تهدیدلر ائکولوژی و اطراف محیط اوچون ده سون درجه تهلوکه‌لی و ضررلی حساب اولونور.
