اوروم نیوز، اسلامی شورا مجلسینده اولان خوی ایله چایپارا نمایندهسی دئدی: دیزج دیز شهرینین جمعیتی اون مین نفردن چوخ اولدوغو اوچون ایچری ایشلر باخانلیغیندان ایستهنیلدی بو شهر بؤلگه اولاراق چئویریلسین و اومید ائدیرم تئزلیکله بو ایش یولونا دوشسون.
تسنیم خبر آژلنسینین راپورونا گؤره موید حسینی صدردیزج دیز شهرینین بلدیه باشچیسینین تانیتیمیندا والیلییین شهرسل ایشلرینین باش مدیری ایله خوی شهرینین مسئوللارینین حضوروندا بو شهرین جامع مسجدینده اولان مراسمده دیزج دیز خالقینا اولان خدمتلره اشاره ائدیب بیان ائتدی: یئددی ایل بوندان قاباق بو شهرین مئیدانی ایله مرکزی کؤرپوسو ایندیکی کیمی دئیللدی و بو مئیدانین تعمیره احتیاجی وار ایدی و مسئوللارین ایشبیرلییی ایله دوزنلندی.
اسلامی شورا مجلسینده اولان خوی ایله چایپارا نمایندهسی آرتیردی: دیزج دیز شهرینین گلیشمه ایشلری نئچه ایلدیر قاباغا گئدیر و شهر آبادانلیغی، مدرسه تیکمه کیمی بؤیوک ایشلر باشلانیبدیر.
صدر دیپلماسی ضعفینی اؤلکهنین دالا قالماسی ایله بودجهنین آز اولما سببلریندن بیلدیریب آرتیردی: بیر دورهده ضعیف دیپلماسی ایله سیاستلر نتیجهسینده اؤلکه بودجه آزلیغی ایله اوز-اوزه گلیب ایشلر ایسه دایاندی، آما بیزیم خالقیمیز بیلیجیدیر و بودا مسئوللارا ان بؤیوک باشاریدیر.
اسلامی شورا مجلسینین صنایع و معدنلر کمیسیونونون عضوو دیزج دیز خالقینی ایشلره بیلیجی اولدوقلارینی آچیقلاییب آرتیردی: دیزج دیز شهری خوی شهرینین بیلیجیلیک درنهییدیر، بو خالق بودجه آزلیغینی بیلرک چتینلیکلرین قاباغیندا دؤزوملو اولدولار.
خوی ایله چایپارانین ملت وکیلی بیان ائتدی: ولایتین۱۸۰ بودجه مادهسی اساسیندا خوی شهرینه عاید اولان ۲۰ میلیارد-دان بیر مقداری استادیومون بوتونلشمسی ایله دیزج دیز جادهسینین اصلاحینا وئریلیبدیر.
خبرین سونو/
