اوروم نیوز ، گئتدیکجه ترافیک‌ده قالماق، ترافیکدن جانا گلمک، ترافیکه گؤره شخصی ماشین چیخارتماماق، ترافیک الیندن قاچماق و بئله-بئله سؤزلر خالقین دیلیندن یئره دوشمور. بیر زامان وار ایدی هر اون ائودن بیریندن ماشین اولماز ایدی، بیر محله‌ده هئچ اون ماشین گؤرونموردو. خیاوانلار ایسه سس‌سیز-صداسیز ایدی. بیری ده یولا چیخاندا راحاتچیلیق ایله سوروجولوک ائدیردیلر.
آنجاق او گونلر خاطیره‌لرده قالدی و بیرده اوجور گونلری گؤرمک اولماز. آما چاره نه‌دیر؟ نه ائتمک اولار؟ ایندیکی دونیادا ماشین‌سیز یاشاماق اولارمی؟ الیمیزدن نه گلیر؟ و…
هر نه‌یی اؤزوموزدن باشلامالی‌ییق
چوخ اولوب نئچه نفر یادا بیر نفر ایله دانیشاندا یئردن گؤیدن گیلئلی قالیب هامینی گوناهکار چیخارتمیشیق. او، بو ایشی گؤرمور، بو او ایشی ائتمیر و…! آما هئچ واخت بونو دوشونوب و دوغرو-دوزگون معنی‌سیندن دئمه‌میشیک بوگوندن هر نه‌یی اؤزومدن باشلامالییام. باجاردیقجا شخصی ماشینیمی شهر ایچینه چیخارتمایاجاغام، ترافیک تابلولارینا (سورعت، احتیاط چیراق‌لاری، عابرلرین حقی و…) عمل ائده‌جه‌یم، باجاردیقجا سیقنال چالمایاجاغام، بیرینین قاپیسیندا ساخلامایاجاغام، و یوزلرجه بئله-بئله سؤزلر.
عمومی آراج‌لار
دوزدو بعضی واخت‌لار هر یئره عمومی ماشینلار ایله گئتمک اولمور، آما یئنه‌ده بو کولتور یئرینه دوشسه چوخ مسئله‌لر حل اولار. حتی بعضی مسئول‌لار بو ایشی گؤرسه‌لر بو کولتور (فرهنگ) چوخ عادی‌لشر. بونون یانیندا چرخدن ده فایدالانا بیلریک. ایستی فصل‌لرده چوخ یئرلره چرخ ایله ده گئده بیله‌ریک. یوزده یوز بیزده اوروپا مملکت‌لری کیمی بئله ایشلری گؤروب اؤزوموزه افتخار ائده بیلریک.
عمومی آراج‌لارلار او جمله‌دن تاکسی‌لر ده خالقیمیزی کئچیندیرمه‌لیدیرلر. بعضا شخصی مسافرچکن ماشینلار اولماسا انصاف ایله دئسک هئچ بیر مسیرده دوردوغوموز دوراق‌دان (ایستگاه‌دان) حرکت ائده بیلمه‌ریک. خصوصا آخشام اوستلری بعضی تاکسی‌لر مسیرلرده حرکت ائتمکدن چکینیرلر.
عابرلر ایله سوروجورلرین حقی
نئجه دئییریک ماشین سورنده عابرلرین حقی‌نه حؤرمت ساخلایاق، ائله‌جه ده عابرلر سوروجولرین حقی‌نی پوزمامالیدیرلار. هر کیسمه اؤزو ماشین سورنده بونو چوخ راحات باشا دوشور. عابرین حقی یوخدور هر یئردن راحاتدی اورادان خیاوانین بو الیندن او الینه کئچسین. چیراق یاشیل اولاندا آتیلسین ماشینلارین قاباغینا. چیراغین ۲۰-۳۰ ثانیه واختی اولور اونودا گؤرورسن نئچه نفر گیردی آرایا و ماشینلار گئده بیلمه‌دیلر.
آیریجا دا پیادا یولوندا حرکت ائتمک، پیادالار اوچون خط چکیلن یئرلرن گئت-گل ائله‌مک، پیادا کؤرپولریندن استفاده ائتمک ده بو مسئله‌یه کؤمک اولار.
ماشینلار دا پیادالار اوچون چکیلن خط‌لرین اوستونه کئچمه‌مک، پیادالارین قانونی حق‌لرینی پوزماماقلار چوخلو چتینلیکلری حل ائده بیلرلر.
فقط من سؤزو
بیر پارا اینسانلار وار (اینشاللاه چوخ آزدیرلار) همیشه و هر یئرده فقط من سؤزونو (سیز اوخویون غیر قانونی سؤزونو) یاخشی بیلیرلر. بورادان من کئچیم، منه پارک یئری تاپیلسین، من تئز چیراق‌دان کئچیم، و یوزلرجه من، من!
نه زامانا کیمی سن؟! بیرآز دا اوبیری‌لرینی دوشون. هامینین ایشی وار، گوجو وار، هامینی گؤزله‌ینلر وار. هامی ایسته‌ییر واختیندا یئرینه یئتیشسین. بس اینسانا یاراشان ایشلر ایله قانونا عمل ائدیب یادا پولیس اولان یئرلرده اونون سؤزونه باخماقلا کؤمکلیک ائدک هامی راحاتچیلیق ایله ترافیکدن کئچسینلر. پولیس اولماسا بیله یئنه ده بیر-بیریمیزه احترام قویماق ایله آخار ترافیک یارادیب مسئله‌لری حل ائدک.
سیز بویورون
بیر فرانسه‌لی ایرانا گلیب اؤلکه‌سینه قاییداندان سونرا سوروشارلار اورانی نئجه گؤردون؟ سوالینین جاوابیندا دئیر: چوخ زادلار جالب ایدی آما من بیرزاددان باش چیخارتمادیم. ایکی نفر بیر قاپی قاباغینا چاتاندا، اوتایدا بیلمیرم نمنه وار ایدی هامی چالیشیردی اول اوبیری قاپیدان کئچسین!
عزیز وطنداشلار بیزده بئله بیر کولتور اولدوغو اوچون ندن اونو ماشین سورمه‌ییمیزه ده گتیرمه‌یک؟ ماشین سورنده ده ائلییه بیلریک احترام اوزوندن مسابقه یئرینه کؤمکلیک ائدک هامی یولدان کئچسین، مئیدانلاردان دؤنسون، کسیلی یئرلردن یولونو ده‌ییشسین و…!
اعصابیمیزی کنترل ائدک
هر شرایط‌ده هر یئرده یادان چیخارتمایاق بیز ماشین سوروروک مقصدیمیزه چاتاق، هئچ کیم ایله مسابقه وئرمیریک! بیری ده سبقته چیخاندا یولونو کسمه‌مه‌لییک. هامیمیز بیر یولو توتموشوق مقصده چاتماغا. مسابقه وئرمک ایسته‌ینلر آدلارینی ماشین مسابقه‌لرینه یازدیرسالار داها موفق اولا بیلرلر.
خانیملارا احترام
بیر خانیم ماشین سوروسه الیمیزی سیقنالا آتیب اونو اذیت ائتمه‌یک. فرض ائدک اؤز آنا-باجیمیزدی. نه اولار لاپ تازا تصدیق آلیپ فرض ائدک. اؤزوموزون لاپ اول گونلر تصدیق آلان واختلاریمیزی دا خاطیرلایاق.
سون نکته
عزیز وطنداشلاریمیز هامیمیز یئری گلنده من فیلان ائدرم من بئمان ائدرم دئییب اؤزوموزو مهندس، دوکتور، چوخ بیلیجی و محترم بیریسی تانیتدیراریق، اما نه یاخشی عملده ده اوجور اولاق و قایدا قانونلارا عمل ائتمکله هامینین بو شهرده راحات یاشاماسینا کؤمک اولاق. بو موضوع دا دئمه‌یه چوخ سؤز وار آما هامیسی قاییدیر یئنه ده قانونلارا عمل ائتمه‌ک ایله بیر-بیریمیزه احترام ساخلاماغا، بس بوگوندن هر نه‌یی اؤزوموزدن باشلاماق لا هئچ کیمی حقی‌نی پوزمایاق.
