اوروم نیوز، غربی آذربایجانین خانیملار اوزره ووشو باش مشقچی سی مخبریمیز ایله دانیشیقدا هئچ کسین بو نوع ایدمانا دقت یئتیرمدیکلرینی دئیه رک، اؤزو و کامانداسینین حسابا گلمه دیگینی سؤیله دی.
فائزه حیدرزاده دئدی: نوروز بایرامیندان اؤنجه بیز شهید باکری آدلی ایدمان زالیندا مشق ائدیردیک آما بو زالی بیزیم الیمیزده آلدیلار و شاهمات ائوی نین ایدمان زالین بیزه وئردیلر کی چوخ کیچیک و ایشه گلمزدیر.
او آرتیردی: ایندی لیکده اؤز جیبیمدن مسعود قدرتی جنابلاری نین ایدمان زالینی اجاره ائتمیشم کی بونوندا وضعیتی چوخ تأسف ائدیجی و بهداشت جهتیندن چوخ گئری دی.
حیدرپور وورغولادی: ولایت مسئوللاریندان و غربی آذربایجان ایدمان اداره سنین رئیسیندن ایسته ییریک کی بیزه یاردیم ائتسینلر و قویماسینلار کاماندامیز داغیلسین. نیه کی گلن آیلاردا اؤلکه چئمپیوناتی اویونلاریمیز وار.
غربی آذربایجانین خانیملار اوزره ووشو باش مشقچی سی سوندا بونو دئیه رک کی ایدمانچی لاریمیزین چوخ محض بو سببه گؤره دای مشقلرده حاضر اولماییرلار خاطرلاتدی: غربی آذربایجان خانیملار کامانداسی چوخ بؤیوک استعدادا مالک دیر و حتی کاماندامیزدا دونیا قهرمانی دا وار.
