اوروم نیوزون مخابره سینه گؤره و دانا بیلگی لندیرمه شبکه سینین یایدیغی معلومات اساسیندا، بصیرت کولتورل قورومو، دانا بیلگی لندیرمه شبکه سی و بین الخالق کن ریور پایلاشما شبکه سی(kenriver.com) نین ایش بیرلیگی ایله بیر بؤیوک یاریشما کئچیریله جکدیر. بو یاریشما بین الخالق سویه سینده و (عشقین یولو) عنوانی ایله فیلم، شکیل و عظمتلی اربعین مراسمینین پیادا یولچولاری مخابره سی قونوسوندا قورولاجاقدیر.
بو یاریشمایا قاتیلماق اوچون علاقه سی اولانلار ائده بیلرلر فیلم، مخابره، قیسا سندلی فیلم، کلیپ و قیسا حکایه بؤلومونده و عشقین مسیری، قافله لر، کیچیک یاشلی لار و … قونوسوندا امام حسین( ع) پیادا زوارلارینا گؤره یازدیقلارینی ایمیل ایله دانا سایتینا گؤندره لر.
هر فیلم، مخابره و یا قیسا سندلی فیلمین سوره سی گرک بئش دقیقه دن یوخاری اولمایا و ها بئله گؤندریلن شکیل، فیلم، مخابره و قیسا سندلی فیلملرین اوزرینده هئچ بیر لوگو ، سیمبل و یا یازی یئر آلمامالی دیر.
اشتراک ائدنلر گرک اثرلری ایله بیرلیکده آدلارینی، سوی آدلارینی، اؤلکه و یئرلشیم یئرلرینین آدرسینی، ارتباط نؤمره لرینی و کیمسه نین حاقی ضایع اولماماق اوچون یاراتدیغی اثرلری حاقیندا قیسا ایضاحات یازیب بو یاریشمانین کاتبلیگینه گؤندره لر.
بو یاریشمانین ایلک اوچ اوستون نفرلرینه خصوصی مادی مکافات هدیه اولوناجاق و ماراقلی اولانلار اؤز اثرلرینی kenriver@kenriver.com و info@dana.ir ایمیللرینه و یا ( تهران، فردوسی میدانی، شاهرود کوچه سی، دانا بیلگی لندیرمه شبکه سی) عنوانینا گؤندره بیلرلر.
خاطرلاتمالی ییق بو یاریشمایا قاتیلماق اوچون چیلله(دی) آیی نین ۱۵-ینه قدر واخت وار و بو تعیین اولونان سوره تمدید اولونمایاجاقدیر.
خبرین سونو/
