اوروم نیوز، بو گون ۱۱۴-جو هجری-قمری ایلی ذی الحجه آیینین ۷-سی مسلمانلارین ۵-جی امامی – محمد باقرین شهادت گونودور.
امام محمد باقر هجرتین ۵۷-جی ایلینده رجب آیینین ۱-ده مدینه‌ده دونیایا گؤز آچیب. باباسینا چوخ بنزه‌دیگی اوچون او حضرتین آدینی محمد قویوبلار. علمین سیرلرینی آشکار ائتدیگینه گؤره ایسه اونا باقر لقبینی وئریبلر.
امام محمد باقرین اماملیق دؤورو آتاسی امام سجادین شهادته یئتیشمه‌سیندن سونرا تقریباً ۲۰ ایل داوام ائدیب.
امام ۱۱۴-جو هجری-قمری ایلی ذی الحجه آیینین ۷-ده خلیفه هشامین امری ایله زهرلنه‌رک شهید اولوب. امامین مزاری بقیع قبریستانلیغیندا، دیگر ۳ امامین یانیندا تورپاغا تاپشیریلیب.
امام باقرین مصیبتی
امام باقر کربلا حادثه‌سینده آتاسی ایله بیرگه ایدی. او، بوتون مصیبتلری و اسیرلیگی یاخیندان گؤرموش و اؤزو ده ظلمه معروض قالانلاردان بیری اولموشدور. امامین شهادتینین نئجه‌لیگی بیر او قدر ده معلوم دگیلدیر. بو ایش هشام ابن عبدالملکین گیزلی پلانی ایله حیاتا کئچمیشدیر. بئله کی، زید ابن حسن هشامین گؤستریشی ایله بیر آتین یهرینه زهر سورتوب اونو امامین حضورونا گتیریر و اونون آتا مینمگینی اسرار ائدیر. امام چاره‌سیز قالیب آتا مینیر و بئله‌لیکله، زهر اونون بدنینه کئچیر. بوندان سونرا امامین بودلاری زهردن شیشیر و اوچ گوندن سونرا شهید اولور.
امام عؤمرونون آخر ساعاتلاریندا وصیت ائتمیشدی کی، اونو اؤز احرام پالتاری ایله کفنله‌سینلر. آما باباسی امام حسنین پاک و تیکه-تیکه اولموش بدنی کربلادا اوچ گون یئرده قالدی. او زامان امام سجاد بنی-اسد قبیله‌سی ایله بیرگه اونو دفن ائتمک اوچون حصیردن باشقا بیر شئی تاپمادیلار. حضرتین بدنی قبیره قویولاندا اوزو قبله‌یه طرف قویولمالی ایدی. آما آتاسینین باشی و بدنی آراسیندا نه قدر فاصله وار ایدی. حضرت زین العابدین نه ائده بیلردی! حضرت غم-غصه ایچره آتاسینین بوغازینین کسیلمیش دامارلاریندان اؤپدو.
دئییرلر کی، بیر شهید آناسی مدینه‌ده بقیع قبریستانلیغیندا اماملارین قبیرلرینی چیراقسیز، گونبزسیز و قبیر داشسیز گؤروب دئمیشدیر: “ای بقیع اماملاری، سیز لاپ غریب و مظلومسونوز! بوندان سونرا من داها شهید اؤولادیمین قبری اوستونه نه بیر گول قویاجاق و نه ده اونو سیله‌جگم…” /قایناق: آران نیوز/
