اوروم نیوز، آذربایجان جمهوریتینین دؤولت نفت شرکتینین نوماینده هئیتی ایرانا ایشگوزار صفری زامانی ایرانین نفت صنایعسی علمی تدقیقات اینستیتوتوندا اولوب.
سحر تئلوئیزیاسینین یایدیغی معاومات اساسیندا آپا-اکونومیستین آذربایجان جمهوریتی دؤولت نفت شرکتینه استنادلا وئردیگی بیلگی لره گؤره ، بو سفرده ایرانین نفت صنایعسی علمی تدقیقات انستیتوتو رهبرینین معاوینی امیر عباس حسینی آذربایجان جمهوریتی دؤولت نفت شرکتینین نفت-قاز علمی تدقیقات لایحه دپارتمانینین رهبری فخرالدین اسماعیلوو، بو دپارتمانین دیرئکتور معاونلری باغیر سولیمانوو و احمد سالمانوو و قئید اولونان شرکتین نانوتکنولوژی دپارتمانینین مدیری والئه شامیلووا بو انسیتیتونون یئرینه یئتیریلن لایحه‌لری، علمی تدقیقاتلار و نانو-تکنولوژی ساحه سینده گؤردوگو ایشلر باره‌سینده معلومات وئریب.
آذربایجان جمهوریتینین نماینده هئیتی ده آذربایجانین نفت و قاز صنایعسینده حیاتا کئچیریلن علمی ایشلر و تکنولوژی لر باره‌ده قارشی طرفه معلومات وئریب.
گؤروشده هر ایکی انستیتو آراسیندا امکداشلیغین گئنیشلندیریلمه‌سی پئرسپئکتیولری مذاکره ائدیلیب و قارشیلیقلی آنلاشما سندلری امضالانیب.
سندده نفت و قاز یاتاقلارینین کشفیاتی، احتیاطلارین قیمتلندیریلمه‌سی، اکولوژی مسئله‌لرین حلی، ائله جه ده تدقیقی و تطبیقی ایشلر اوزره بیرگه امکداشلیق نظرده توتولوب.
