س: اوجوزلوق عمی چوخ خوش گلیب سن. اؤزونوزواوخوجولاریمیزا تانیتدیرین.
آی ساغ اولاسان . من، اوجوزلوق. یئریم هر یئردیر. مین اوچ یوز نم نئچه ده دونیا یا گلمیشم. هله – هله ده بورادا قالماق نیت-یندیم.
س: چوخ گؤزل ! اوجوزلوق عمی اؤزوندن دئ. هاردان باشلاییب سان نه لر ائدیب سن؟
من دونیا یا گلندن، اؤزومو تانیمیشام و هدفیم هامییا یاردیم ائتمک اولوب. هامی راحاتچیلیقدا اولدوغو اوچون الیمدن گلنی ائتمیشم. من اولان یئرده هرنه بولان- سالان اولوب، آلیش- وئریش ایسه چوخ راحات اولور. یاشام بویو اللریم گؤیده اولوب و هامی نین مندن راضی اولدوغونا گؤره دوعا ائدرم. چالیشیرام چوخ گلیری اولمایانلارا داها چوخ یاردیم ائدم. اونلارین دا یاشاییش حاققی واردیر و من ده اونلارا قوللوق ائتمه یی اؤزومه وظیفه ائتمیشم. هر کیم منی سئوسه من ایسه اونون یانیندا اولاجاغام.
س:اوجوزلوق عمی، بیلدیگین کیمی چوخلاری سنین اولدوغونو خئیر- برکت بیلیب و یاشاییش خرج لری ایسه اونلار راحات اولور. کیم لر سیزی اونلاردان آییریر و سنی بورالاردان آپاریر؟
من بوتون طرفدارلاریمی سئویرم و خاص حؤرمت ساخلاییرام. هئچ زامان اونلاردان واز کئچمک ایسته مه ییرم. بو آرادا بعضی لری ایسه منی سئومه ییب منی طرفدارلاریمدان آییریر. اونلار بیر فورصت آختاریب آرانی قاتیب، بالیق توتورلار. آرا سؤزلریندن فایدالانیب اؤزمنفعت لری اوچون چوخلارینین یاشاییش خرجلرین آغیرلادیرلار. من بو ایش لرینی هئچ سئومه ییرم. الیمدن گلدیگی قدر اونلارین بو ایشینه غلبه ائده جه یم. بئله کیمسه لر فقط اؤزلرینی دوشونورلر و بو ایش لریندن ال چکیب هامی نی دوشونمه لیدیرلر.
س: اوجوزلوق عمی چوخ گؤزل و دیرلی سئویله دیندیز. سیزجه نه یوللار ایله سنین طرفدارلارین سنی هر زامان اؤز یانلاریندا گؤره بیله رلر؟
بو ایش منیم اؤزوم اوچون بؤیوک افتخاردی. بو ایش اوچون چوخلو باخیش لار اولابیلر. منجه بونا هامی یاردیم ائتمه لیدیر.
لیدرلر، عادی طرفدارلار و هامی ال- اله وئریب منیم قالماغیما یاردیم ائده بیلرلر.
لیدرلر بعضی گوجلو قانونلار، دیققته آلماق لار و باخیش آلتینا آلماق لار ایله، طرفدارلار ایسه اؤزلری ایش بیرلیغی آپاریب لیدرلر ایله بیرگه منی هر زامان گؤره بیلرلر. اینانیرام بو ایش اولابیلر و واقعیته چوخ یاخین دیر.
س: اورک ده اولان ، سون سؤز اولاراق بویورون؟
منی بورا چاغیردیغینیز اوچون سیزدن تشککور ائدیرم. من اومود ائدیرم بعضی منفعت طلب آداملار اؤزلرینه گلیب هامینی دوشونوب، هامی خوشلوق ایله یاشاسین.//دانیشیغی آپاران: حسین واحدی/ خاطره لر دوراغی بلوقو//
