اوروم نیوز، زامان اؤتدوکجه، محبت اورکلردن آزالیر؛ یوموشاق اورکلر، دؤنوب داش اولور. رحمسیزلیک محبتین یئرینی آلیر.
انسان عمری نه قدر کئچدیکجه، عدالتسیزلیگ، دوشمنلیک چوخالیر .
آی انسان! قولاق وئرگؤر نه هارایدیر؟ کیمین سسیدیر بیر هنیرتی سس، سنی سسله ییر،منی سسله ییر..
آی انسان! دور آیاغا ال – اله وئریب، قول – قولا دایاناق، گل بیر اولاق، بیر دئییب، بیر دانیشاق.
قالخ کی، جهالت، عداوت و آزغینلیغین کؤکونو دیبدن قازیب، یئرینده محبت آغاجی اکک.
آی انسان! گل اورکلردن تیکان چکیب، یئرینه گول سانجاق .
گل سس – سسه وئریب، محبت نغمه سینی ترنم ائدک. خیال قوشونا قاناد وئریب، ایستکلره الوان دون بیچک .
گل یوخسوللار هارایینا، سس وئریب، کؤمکسیزلرین الیندن یاپشیب ظلمی آرادان قالدیراق؛ قوزغون صفت انسانلار قاباغیندا اصلان تک دایانیب، اونلارین بورنونو یئره سورتک.
گل دوزلوک یولوندا سیرائدیب کج یولو باغلایاق، صداقت چیچکلرینی سوواریب، گوللندیرک .
حق سویله ییب ناحق آغاجینین کؤکونو قازاق؛ محبت پنجره سینی اوزلره آچیب پوزغونلوق کدرینی اورکلردن سیلک .
گل ظالیمین چکدیگی ناخیشلارینی محو ائدک، آرزو زمیسینی اودا چکک.تولکو صفت انسانلارا بوردان قوواق.
کاش حسرتده قالان باخیشلارا بیر قاپی آچا بیلیدیک. مظلوم اوشاقلارین گؤز یاشلارینی سیلهبیلیدیک.
گل طبیعتده یئنی بیر حیات یاراداق؛ بوهارایلار سنی سسله ییر، منی سسلهییر، گل بونلارین سسینه سس وئرمک، اوزانمیش اللریندن توتامق گرکدیر.
او اللر بیر مظلوم اوشاغین تیتره ین الی، بیر یوخسولون بوش الی، بیر نیسگیلینین حسرتلی الی… بیر انسان الیدیر، قارداشیم، باجیم!
او اللر… سنین الیندیر، منیم الیمدیر، اونون الیدیر، بیزیم الیمیزدیر.
یازان: علی مهدیزاده/ قایناق: مصطفی قلیزاده جنابلارینین بلوقو
