اوروم نیوز،غربی آذربایجان‌ین اسلام تبلیغاتی‌نین مداح‌لار درنگی نین مسئولو دئییب: اربعین گونو عزالی‌لار “ولایت فقیه” میدانیندا حاضیرلانان یئرده اولاجاق‌لار.
امیر اصغری تسنیم خبر آژانسی‌نین اورمیه‌ده‌کی مخبریله دانیشیق‌دا آرتیریب: بو ایل ده کئچن ایللره تای اربعین گونو اوچون اولان عزادارلیق مراسمی‌نین نئجه کئچیریله‌جه‌یی باره‌ده غربی آذربایجان‌ین اسلام تبلیغاتی قورولوشو ایله لازم اولان اویغونلاشمالار ائدیلیب‌دیر.
او وورغولاییب: حسینی عزالی‌لار اورمیه‌ده اربعین صوبحو ساعات ۱۰-دان امام خمینی (ره)، شهید منتظری، شهید مطهری ایله شهید طالقانی خیاوانلاریندا عزادارلیق ائدیب سونرا ولایت فقیه میدانیندا اولان اصلی یئرده اؤز عزادارلیق‌لارینی سونا چاتدیراجاق‌لار.
غربی آذربایجان‌ین اسلام تبلیغاتی‌نین مداح‌لار درنگی نین مسئولو، اورمیه‌ده ۷۵۰ مذهبی هیئت‌ین اولدوغونا اشاره ائدیب آچیقلاییب: ایندیلیک‌ده ولایت‌ده بیر مین ۸۰۰ معینلشمیش مذهبی هیئت موجوددور.
اصغری غربی آذربایجان‌دا مذهبی هیئت‌لرین کؤکونو ۲ مین ۴۰۰ دن چوخ اولدوغونو وورغولایاراق دئییب: ایندییه کیمی مذهبی هیئت‌لر عضولرینین ۵۰۰ عائله‌سی درمان خدمت‌لری بیمه‌سینه قبول اولونوب و ۷۵ نفر ایسه حسین(ع) خادمی و مذهبی هیئت‌لرین عضوو عنوانی ایله تامین اجتماعی‌نین امکلیلیک بیمه‌سینه قبول اولونوبلار.
