اوروم نیوز، غربی آذربایجانین عمومی کتابخانالارینین باش مدیری دئدی: تاسف ایله ایندیلیکده یوزده ۳ و بو ساییمدان آز بیله ولایتین عمومی کتابخانالارینا عضودورلر.
مهر مخبرینین وئردییی راپورا گؤره، علی فیروز یکشنبه گوناورتادان قاباق کتاب هفتهسینین یئتیشمهسی مناسبتی ایله مخبرلر ایله دانیشیقدا، کتاب هفتهسی عمومی کتابخانالارین آرتیق تانیتیمی اوچون یاخشی بیر بهانه اولدوغونا اشاره ائدیب بیان ائتدی: عمومی کتابخانالار خالقین هامیسینا گؤره قورولوب اداره اولونور و خالقین هامیسینی کتابخانالاردا عضو اولوب اورانین خدمتلر ایله وطنداشلیق حقلریندن فایدالانماغا دعوت ائدیریک.
او، بو هفتهده بیر مین ۶۵۴ جلد کتاب وطنداشلار طرفیندن کتابخانالارا پای وئریلمهسینی آچیقلایاراق دئدی: ولایتده ۶۷ باب عمومی کتابخاناخدمت وئرمک ایله خالق کؤمکلرینی آلماق اوچون ایل بویو هر زامان حؤرمتلی وطنداشلارین (شهروندلرین) اوزونه آچیقدیر.
فیروز بیلدیردی: بو آرادا اورمیهنین مرکزی کتابخاناسی ۱۰۱۸ نفر له، اورمیهنین شهید باهنر-ی ۵۸۶ نفر له و خوی-ون پانزده خرداد-ی ۵۹۰ نفر ایله لاپ چوخ عضولری وارلاریدی.
او، ایندیلیکده اؤلکهنین اوچ مین ۱۸۰ کتابخاناسیندان ۱۱۵ کتابخاناسی غربی آذربایجاندا چالیشدیغینا اشاره ائدرک آرتیردی: لاپ سون ساییم (آمار) اعتباری ایله ۷۰ مین نفر ایندی غربی آذربایجان کتابخانالارینا عضودورلر و اونلارین طرفیندن ۵۳۴ جلد کتاب امانت آلینیبدیر.
غربی آذربایجانین عمومی کتابخانالارینین باش مدیری داوام ائتدی: اؤلکهنین کتابخانا قورولوشلاریندا اولان ۱۰ مین ۶۶۳ بیلگیسایار-دان (کامپیوتر-دن) ۴۳۸ بیلگیسایاری ایسه غربی آذربایجان کتابخانالاریندادیر.
فیروز، معظم رهبرین “کتاب اوخوما واجب بیر فریضهدیر” تاکیدلرینه اشاره ائدیب دئدی: ایرانلیلارین هامیسی عمومی کتابخانالار ایله موجود اولان قایناقلاردان بیر پایی واردیر و خالقیمیزی عمومی کتابخانالاردا عضو اولوب خدمتلر ایله وطنداشلیق حقلریندن فایدالانماغا دعوت ائدیرم.
او دئدی: ایندیلیکده ۶۷ باب عمومی کتابخانا چئشیدلی (متنوع) امکانلار لا خدمتلر او جملهدن: آنلاین عضولوک (عضویت)، آنلاین کتاب آختاریشی، www.samanpl.ir سیستمینده منبعلری اوزاتما (تمدید) ویا رزرو ائتمک، کتاب امانتی، مرجع خدمتلرین وئریلمهسی، بوتون کتابخانالاردا اوشاقلار اوچون مخصوص برنامهلر له ناغیل دئمک، کتاب تنقیدی اوچون جلسهلر قویماق، اینترنتسل خدمتلر ایله وطنداشلارین قوللوغوندادیر.
