اوروم نیوز، غریبلیک هر وطنیندن اوزاق دوشن غریبین تجربه ائتدیگی تانیش بیر دویغودور. غریبلیک، کیمسهسیزلیکدیر. تانیشسیزلیقدیر. آرخاسیزلیقدیر. اؤلکهمیزدهکی اماملار و امامزادالار غریبلیکلرینه رغماً بیزه هر آددان داها آرتیق دوغما ساییلیرلار.
اونلار عراقدا و حجازدا دوغولموشلار. بیزیم تورپاقلارا منّت ائدیب آیاق قویوبلارسا بیز بو منّتین قدرین بیلمهلی و آددیملارینین تورپاغین گؤزلریمیزه سورمه ائتمهلیییک. عراق یاخود حجازدان اولسالار دا ایران تورپاغیندا داها دوغمالاشیبلار و مرتبهلری و درجهلری داها آرتیق اوزه چیخیر و تانینیر.
بو یئرده امام علیالنقی علیهالسلامین نسلیندن اوچو تورپاغا تاپشیریلمیشدیر. بو یئر سالماسدان چوخ دا اوزاق اولمایان برگشاد کندیدیر. سالماسدان بورایا ۵ کیلومتر یولدور. نئچهلری اهل بیت علیهمالسلامین سئوگیسین نیت ائدیب بو یولو آیاقلاری ایله گئدرلر. امام اولادلاری محمد، ابراهیم و جعفر علیهمالسلاملاری زیارت ائدرلر. معتبر شجرهنامهلره گؤره اونلار اونونجو امامین اولادلارینداندیر.
بیر عده دئییملره گؤره ده بوراداکی عالیجنابلارلا سالماسین تازاشهریندهکی امامزادالار آراسیندا یاخین قوهوملوق اولموشدور. اونلارین آراسیندا قوهوملوق نسبتی اولماغا شبهه ائدیلمیر چونکی هامیسی بیر امامین اولادلارینداندیر آنجاق آرالاریندا یاخین قوهوملوق اولماغا محکم سند یوخدور.
بو یئر یئددی یوز ایلدن بری اهل بیت عاشقلری و امامت و ولایت سلالهسینین یانیقلیلارینین زیارت ائتدیکلری یئر اولموشدور. یئددی یوز ایلدن بری مؤمن انسانلار بو اوجاغین روحانی خلوتینده دعا ائتمگه مشغول اولموشلار و حسین عاشقلری اونون کناریندا شهیدلر آغاسینین خاطرهسین جانلاندیرمیشلار.
یوز ایللر بویوندا اوجاغین تیکینتیسی زیانلار گؤرموش آنجاق اونون سئوگیلی زوّارلاری همت ائدیب اونو یئنیدن برپا ائتمیشلر. بیرینجی دونیا محاربهسی و قیزیل اوردونون اؤلکهمیزه هجوموندا اوجاغین بیناسی چوخلو مقداردا زیان گؤردو.
نهایت ۱۳۹۰(۲۰۱۱)-جی ایل یئرلی اهالینین چالیشمالاری و خیریه ایشلری نتیجهسینده یئنیدن برپا ائدیلدی. ۱۳۰۹(۱۹۳۰)-جی ایلین زلزلهسینده اساسی زیانلار گؤرن بینا بیرداها یئنیدن قورولموشدور. اونون اساسی تعمیرات ایشلری سون ایللرده اولموشدور. اونون بیناسی گئنیشلنمیش و گؤزل کاشیلارلا زینت وئریلمیش و مزارین اوستونه گؤزل بیر ضریح یئرلشدیریلمیشدیر.
بونلارلا زوّارین سایی چوخالمامیشدیر. چونکی زوّار داشین و کاشینین، یاخود تونجدان دوزهلدیلمیش ضریحی زیارت ائتمیر. اوجاغین بوگونکو زوّاری ائله اوّلکی کهنه بینانین ایچینده آغاج ضریحی زیارت ائدنلردیر. اورهگی عشقلی زوّار اماملارین عطرین بو تورپاقدا یاتانلاردان آلیر. بینانین گؤزللیگی زوّارا یاخشی دویغولار آشیلاییر و بینانی یئنیدن برپا ائدن خیریهچی چالیشیبدبر بو دویغونو آشیلاماقدا پایی اولسون و بو پایی بیر چیراق قاییریب اونونلا آخرت یولون یالنیشسیز و سهوسیز گئتسین.
امامزادالار و سیدلرین مقدس اوجاقلاری خلقین معنوی دایاقلاری ساییلیرلار.
