اوروم نیوز، اورمیه-تبریز یولو (شهید کلانتری جادهسیندن)، اورمو گؤلونون کؤرپوسو قورتولاندان سونرا، داها یاخین اولاراق گونده یوزلرجه ماشینین گئت-گل یولو اولوبدور. زامان اوزوناسیندا یولون گئنیشلندیرمهسی ایله بوتونلشمهسی اوز وئریبدیر.
بیر سیرا کندلرین یوللارینین کسیلمه سی ان اؤنملی مسئله
بعضی ایشلر بو مهم جادهده یولا دوشسه ده، بیرپارا مهم و گرکلی ایشلر هله ده قاباغا آپاریلماییبدیر. ایستر ایستهمز شهید کلانتری یولو اونلارجا کندین یولونون اوستونده وورولوبدور. بو آرادا بو کندلرین آنا یوللاری دا شهید کلانتری جادهسیندن آیریلیر. بعضیسی یول قیراغیندا بعضیسی ده چوخ چتینلیک له دؤنگهلردن (بریدهلردن) دؤنوب کندلرین یولونا گئدیلیر.
مثال اوچون طلاتپه جادهسینه گئتمک اوچون جادهده کسیلمه یئردن دؤنوب سونرا طلاتپه جادهسینه گئدیلیر. آنجاق بو آرادا توو ایله گئت-گل ائدن ماشینلارین و اورادان دؤننن ماشینلارین اوتورانلارینین جانی خطره دوشوب بعضا ده توققوشمالارا سبب اولور.
بو مسئلهنی حل ائتمهیه گؤره نئچه ایل بوندان قاباق کامیونلار ترمینالینین قاباغیندا ایکی کؤرپو سوتونو وورلوب یاریمچیق قالیر. یوزده یوز بو کؤرپولر وورولسا چوخلو خطرلرین قاباغیدا آلیناجاقدیر.
ماشین کؤرپولرینین یانیندا جاده کناریندا اولان کند جماعتینین بو الدن او اله کئمهیه ده عابر کؤرپوسو اولمادیغیندا چتینلیک چکیرلر. خصوصا اوشاقلارین شهرده مدرسهیه گئتدیلری زامان سحر چاغلاری بو مسئله داها آرتیق گؤزه دهییر.
جاده نین ایشیق سیزلیغی حادثه یارادان فاکتورلارداندیر
جادهنین ایکینجی مسئلهسی قارانلیق گلرکن ایشیقسیزلیق مسئلهسیدیر. تاسف ایله چیراق تیرلری وورولسادا هله ده ایشیقلاری یانماییر.
کندلیلر ایله تبریزه گئدن مسافرلردن علاوه صنعتی شهرجییین بیرینجی فاز-ینا گئنلرده بو یولدان تردد ائدیرلر. بو حسابلار جاده ده عزیز ایشچیلریمیزین ده مسئلهسی اولوبدور. خصوصا قار-یاغیش یاغاندا بو ایشیقسیزلیق و گاردلارینی عکس ائتدیریجی ائتیکتلرینین آرادان گئتمهسی او یولو دهشتلی بیر یولا چئویریر.
ایندی بو تیرلر وارکن چوخ یاخشی اولار عزیز مسئوللار تئزلیک له بو مسئلهنی حل ائتمهیه بیر فیکیر قیلسینلار. بو آرادا بو جاده دن آیریلان فرعی یوللارین چالا-چوخورو دا گئت-گئده آرتیر و دوغرو دوزگون یئتیشمک لازمدیر.
هرحالدا بونلار اورادا یاشایان کندلی لر ایله بیرینجی صنعتی فازدا چالیشانلارین و جادهده تردد ائدن هرکسین دردی ساییلیر و اومید ائدیریک حؤرمتلی مسئوللار تئزلیک له ایشلری یولونا سالالار.
