اوروم نیوز، علامه طباطبایی اونیورسیته سینین سیاسی بیلی ملر و حقوق فاکولته سینده دوزنلنن نوکلر دیپلوماسی کنفرانسیندا دانیشان ظریف، ایران و ۵+۱ قروپو آراسیندا دوام ائدن نوکلر مذاکره لرین سویوق ساواش سونراسی ان اؤنملی اولوسلار آراسی قونولاردان اولدوغونو و آنلاشمانین دئتایلارینی یازماق اوچون زامان گرکدیگینی و بوندان دولایی مذاکره لرین ۷ آی اوزاتیلدیغین سؤیلهدی.
مذاکره لرین ائنیشلری چیخیشلاری اولدوغونو افاده ائدن ظریف ، بونلارین مذاکره لرده دوغال اولدوغونو زیرا مذاکره قارشی فیکیر صاحابی شخصلر آراسیندا آپاریلدیغینی و بیر ایکی گونده ده سونوچلانمایاجاغینی سؤیله دی.
ظریف سؤزلرینین دوامیندا، ” بوگون دوزنلنن بو کونفرانسدا چوخ فرقلی قونولار اینجلنه جکدیر. آما منیم، مذاکره لر ایله ائلده ائدیلن قازانچلار حاققیندا دانیشمام گرکمکته دیر. بیرینجی اولاراق، مذاکره لرین باشاریلی بیر سونوجا اولاشماسینا چوق یاقلاشدیق و سون ۱۰ ایل ایچریسینده هئچ بیر زامان، سونوجا وارمایا بو قدر یاخینلاشامامیشدیق. ایکینجی اولاراق، ایران اسلام جمهورییتی آیریجا یئنی بیر داورانیش مدلی سرگیله میشدیر کی سوروملولوقلار و منطق چرچوه سینده کی توتوملار، بو مدلین ان آچیق اؤزللیکلری دیر. اوچونجو قونو ایسه دونیاداکی بعضی اؤلکهلر طرفیندن یوروتولن ایرانوفوبی و اسلاموفوبی چالیشمالارینین آرتیق ائتکی سیز اولمایا باشلاماسی و یوخ اولما یولوندا اولمالاری دیر. دؤردونجو اولاراق دا توم زورلوقلارا رغماً، سون ۱٫۵ ایل ایچریسینده گئرچکلشن چالیشمالار ایله مذاکره لرین گله جگی پارلاقدیر و اسکی دوروملارا دؤنمه یجکدیر ” دئدی.
ظریف ، ‘’دونیا بوگون ایران خالقینا سایغی دویماقدا، دونیا بیزیم یؤنتمیمیزه سایغی دویماقدا و مذاکره لر سونوجوندا اولوسلار آراسی اتمسفر ایران لهینه دگیشمیشدیر. مذاکره لر ایله ایران داها امنیتلی بیر اؤلکه وضعیتینه گلمیشدیر و آرتیق کیمسه ایران علیهینه ساواش نعره لری آتاماز و ایران علیهینده کی دوشمانلیق آتموسفری ییخیلمیشدیر و دونیا ایران خالقی ایله منطق، سایغی، دیالوگ، قارشیلیقلی آنلاییش و منفعت اساسینا آنلاشمایا واریلاجاغینی آنلامیشدیر’’ دئدی.
