اوروم نیوز،اسلام عالملری باخیشیندا افراطچی و تکفیری جریانلارین گؤرکمی” آدلی بین الخالق قورولتایین اشتراکچیلاری بو گون اسلام انقلابینین عالی رهبری حضرت آیت الله العظمی خامنه ای نین قبولوندا اولوبلار.
اسلامی انقلابین بؤیوک رهبری همین گؤروشده تکفیری قروپلارین اسلام دونیاسینین بیرلیگینه ووردوغو ضربهلره توخوناراق، همین آسی لی جریانلارین اسلام دونیاسینین اساس مسئله سی اولان فلسطین مسئله سی و صهیونیست رژیمین تهلو که لری و جنایتلریندن یایینماسینا سبب اولماسینی بؤیوک تهلوکه حساب ائدیبلر.
آیت الله العظمی خامنه ای ایران خالقینین هئچ واخت غرب طرفیندن آشیلانان فیکیرلر و جریانلارین تاثیری آلتینا دوشمهمهسینی وورغولایاراق بویوروبلار: ایران خالقی صهیونیستلرله مبارزهنین وورغونودور. بیزیم خالقیمیز بو استقامتده یئکدیلدیر. بیز مذهبلر آراسی اختلافلارین اسیری دئییلیک و نئجه کی لبنان حزب اللاهینا یاردیم ائتدیک، حماسا و فلسطیندهکی جهاد حرکاتینا دا دستک وئردیک و بونو داوام ائتدیرهجه ییک.
اسلامی انقلابین بؤیوک رهبری تکفیری قروپلارین اسلام دونیاسینا ووردوغو ضربه لره گلینجه بیلدیریبلر: تکفیری جریانلار اسلامین سیماسینی زده له دی و اونو پیس گؤستردی. تکفیری لر غزه نی ۵۰ گونلوک محاربه ده تک قویدولار.
اسلام انقلابینین بؤیوک رهبری بویوروبلار: من تأسف ائدیرم کی اسلام دونیاسی صهیونیست رژیمله قارشیلاشماقدانسا، تکفیری جریانلارین قبول ائتدیردیگی مسئله لرله مشغول اولوب. اساس مسئله صهیونیست رژیم تهلوکه سی و مسلمانلارین ایلکین قبله سی مسجدالاقصی نین مسئله سی دیر.
