اوروم نیوز، ایرانین نووه مذاکره هئیتینین باش عضوو عباس عراقچی ایران ایله بئش اوسته گل بیر قروپو آراسینداکی نووه مذاکرهلری حاقدا سون دگرلندیرمه باره ده وورغولاییب: نووه راضی لاشماسی هر ایکی طرفین و بؤلگه نین خئیرینه اولاجاق و بو جهتی مذاکره طرفلری درک ائدیرلر.
عراقچی وورغولاییب کی، هئچ کس ژنو راضی لاشماسیندان اؤنجهکی شرایطه قاییتماق ایسته میر. او، علاوه ائدیب: ایران و بئش اوسته گل بیر قروپو راضی لاشماقدا جدی دیرلر و راضی لیغا چاتماق چتین دگیل.
عراقچی سؤیلهییب: اگر قارشی طرف داها چوخ خوشمراملی لیقلا مذاکرهلرده اشتراک ائتسه و ایران رئاللیقلارینی داها یاخشی تانییارسا، راضیلیغا چاتماق چوخ یاخین اولاجاق.
ایرانین نووه مذاکره هئیتینین باش عضوو عمانین پایتاختی مسقطین نووه مذاکرهلرینین نوبتی مرحله سینین کئچیریلمه سی مکانی تعیین ائدیلمه سینین سببی بارهده بئله دئییب: عمان بئش اوسته گل بیر قروپو ایله ده صمیمی علاقه لره مالک و ایرانا سون درجه یاخین و دوست اؤلکه کیمی کئچمیشده نووه مذاکرهلرینده اولدوقجا یاخشی و مثبت رول اویناییبدیر.
ایرانین خارجی ایشلر باخانی محمد جواد ظریف، آمئریکانین دولت کاتبی جان کری و آوروپا بیرلیگینین ایران ایله بئش اوسته گل بیر قروپو آراسینداکی نووه مذاکرهلریندهکی نمایندهسی کترین اشتون آراسیندا اوچ طرفلی اجلاس عمانین پایتاختی مسقطده کئچیریلهجک.
