اوروم نیوز، خوی شهرینین مرکزی و اسگی بازار و تازالیقدا گؤرکملری یئنیلشن یا خود آرادان گئدن سایر بنالارین یانیندا یئرلشن مطلب خان مسجدیدیر. بو مسجد اسلامی شهرلرین گؤرکمین و اونلارین بؤلوملرینین بیری-بیرینه اویغون تیکیلمهلرین خاطرلادیر.
بو مسجدین تیکیلمهسینین دقیق تاریخی الده یوخدور آنجاق اونون سونرادان نه علتلره گؤره داغیلمیش ایلکین بناسینین ائلخانلیلار دؤورونده تیکیلمهسی احتمال ائدیلیر. و یئنه احتماللارا گؤره بوگونکو مسجد قاجارلار دؤورونده او داخمالارین اوستونده تیکیلمیشدیر. مطلب خان مسجدینین بیر بؤیوک اوستو آچیق شبستانی واردیر.
اونون دؤردبوجاقلی پلانی واردیر و چئورهسینده اوجا شاهنشینلر، حجرهلر و بؤیوک ایوان یئرلشیبدیر.
بو بنانین ایشلهمهسینده عمومیتده کرپیچ ایشلنیبدیر و شاهنشینلرین اوستو، شبستانین گیرهجگینین تاغی گؤزل گچتاراشلیقلار ایله بزهدیلمیشدیر. مطلب خان مسجدی غربی آذربایجان ولایتینین اسلامی معمارلیق اؤرنگی اولاراق اوستو آچیق شبستانا مالک اولماق ایله اؤنملی تاریخی مسجدلریندن بیری، بلکه ده ان اؤنملیسیدیر. اونون تایی آز اولموشدور بلکه ده تایسیزدیر.
اونون گؤرمگی هر توریسته اؤزللیکله آراشدیریجیلار و اؤیرنجیلره فایدالی اولاجاق و یوردوموزون کئچمیش اسکی و اسلامی معمارلیغیندان بیر چوخ شئیلر اؤیرهدهجکدیر.
