اوروم نیوز، ایرانین خارجی سیاستینده قونشو اؤلکهلرله علاقه لرین انکشاف ائتدیریلمه سی اؤنلمی مسئله لردندیر. آذربایجانین ایسه قونشو اؤلکهلر آراسیندا اؤزونه مخصوص و اؤنملی یئری وار.
ترئند خبر آژانسینا دانیشان، ایران پارلامنتینین ملی تهلوکه سیزلیک و خارجی سیاست کمیسیونونون عضوو جواد جهانگیرزاده جمهورباشقانی حسن روحانی نین آذربایجانا گله جک سفرینی شرح ائدرکن دئییب.
جهانگیرزاده بیلدیریب کی، ایران و آذربایجان دوست و قارداش اؤلکهلردیر و هر ایکی اؤلکهنین خالقلارینی بیر-بیرینه درین تاریخی، مدنی و دینی کؤکلر باغلاییر: “بو درین باغلارین اولماسی و اؤلکه جمهورباشقانلارینین دوستلوق مناسبتی آذربایجان و ایران آراسیندا علاقه لرین انکشاف ائتدیریلمهسی اوچون زمین یارادیر“.
اونون سؤزلرینه گؤره، آذربایجان و ایران آراسیندا حاضردا تجارت علاقه لرینین سویهسی قناعت بخش دگیل: “ایکی اؤلکه آراسیندا تجارت حجمی ۵۰۰ میلیون دولاردیر. بو رقم ایکی قارداش اؤلکهنین شأنینه اویغون دگیل و بیر نئچه دفعه آرتیریلمالی دیر“.
اسلامی شورا مجلسینین عضوو دئییب کی، آذربایجان و ایران آراسیندا اقتصادی علاقه لرین انکشافی اوچون گئنیش پتانسیل وار: “هر ایکی اؤلکه نفت، قاز، انرژی، تجارت و صنایع ساحه لرینده امکداشلیغی گئنیشلندیرمه لی دیر. ایراندا استحصال اولونان محصوللارین آذربایجاندا و آذربایجاندا استحصال اولونان ماللارین ایراندا ساتیشی اوچون ال وئریشلی شرایط یارادیلمالی دیر“.
جهانگیرزاده قئید ائدیب کی، آذربایجان و ایران جمهورباشقلانلارینین مناسبتلرین یاخشی لاشماسینا باخیشلاری مثبتدیر و بو اؤزو ایکی اؤلکه آراسیندا علاقه لرین انکشافی اوچون زمین یاراداجاق.
قئید ائدک کی، ایران جمهورباشقانی حسن روحانی نین بو آیین اورتالاریندا آذربایجانا سفری گؤزله نیلیر.
