اوروم نیوز، معاویه ۶۰-جی هجری قمری ایلینده اؤلندن سونرا، خلافتی غصب ائدن ملعون یزید، مدینه حاکمینه مکتوب گؤندریر. بو مکتوبدا امام حسیندن (ع) بیعت آلینماسی بیان ائدیلیردی. امام (ع) یا بیعت ائتمهلی ایدی، یا دا اؤلدورولمهلی ایدی. امام (ع) اسلام امتی اوچون مهم شخصیت اولدوغو اوچون، اونون بیعت ائتمهمهسی اؤلدورولمهسی تهلوکهسینی اؤزو ایله گتیریردی. غصبکار ملعونون منطقینه گؤره، اولا بیلمز کی، امام (ع) ساغ اولسون و یزیده بیعت ائتمهسین. چونکی اگر امام (ع) یزیدین حکومتینی قبول ائتمهسه یدی، بو، یزیدین اعتبارینی آلچالداردی. اونا گؤره ده طلب بئله ایدی کی، اگر امام (ع) ساغ قالماغینی ایستهییرسه، گرک اونونلا بیعت ائدیدی.
امام حسین (ع) بیلیردی کی، یزید حکومتینه گؤره اوندان بیعت آلماق ایسته یهجکلر. اونا گؤره ده امام (ع) بئله بویورموشدو:”اگر یئر اوزونده هئچ بیر پناه یئریم اولماسا بئله، یزید ابن معاویه ایله بیعت ائتمرم“.
امام (ع) مدینهدن مکه یه طرف حرکت ائدیر. حج مراسمی اولدوغو اوچون حجازا چوخ سایدا انسان آخیشیردی. امام (ع) حاجی لارلا گؤروشوب، اونلارا اؤز نیتینی آچیقلادی.
امام (ع) مدینهدن چیخان زامان اؤز وصیتنامه سینی یازیب، قارداشی محمد الن حنفی یه وئردی.
امام (ع) بو وصیتده یازمیشدی:
“بِسْمِ اللَّهِ الرَّحْمنِ الرَّحِیمِ
«هَذَا مَا أَوْصَى بِهِ الْحُسَیْنُ بْنُ عَلِیِّ بْنِ أَبِی طَالِبٍ إِلَى أَخِیهِ مُحَمَّدٍ الْمَعْرُوفِ بِابْنِ الْحَنَفِیَّهِ أَنَّ الْحُسَیْنَ یَشْهَدُ أَنْ لَا إِلَهَ إِلَّا اللَّهُ وَحْدَهُ لَا شَرِیکَ لَهُ وَ أَنَّ مُحَمَّداً عَبْدُهُ وَ رَسُولُهُ جَاءَ بِالْحَقِّ مِنْ عِنْدِ الْحَقِّ وَ أَنَّ الْجَنَّهَ وَ النَّارَ حَقٌ وَ أَنَّ السَّاعَهَ آتِیَهٌ لا رَیْبَ فِیها وَ أَنَّ اللَّهَ یَبْعَثُ مَنْ فِی الْقُبُورِ وَ أَنِّی لَمْ أَخْرُجْ أَشِراً وَ لَا بَطِراً وَ لَا مُفْسِداً وَ لَا ظَالِماً وَ إِنَّمَا خَرَجْتُ لِطَلَبِ الْإِصْلَاحِ فِی أُمَّهِ جَدِّی أُرِیدُ أَنْ آمُرَ بِالْمَعْرُوفِ وَ أَنْهَى عَنِ الْمُنْکَرِ وَ أَسِیرَ بِسِیرَهِ جَدِّی وَ أَبِی عَلِیِّ بْنِ أَبِی طَالِبٍ ]علیه السّلام[ فَمَنْ قَبِلَنِی بِقَبُولِ الْحَقِّ فَاللَّهُ أَوْلَى بِالْحَقِّ وَ مَنْ رَدَّ عَلَیَّ هَذَا أَصْبِرُ حَتَّى یَقْضِیَ اللَّهُ بَیْنِی وَ بَیْنَ الْقَوْمِ بِالْحَقِ وَ هُوَ خَیْرُ الْحاکِمِینَ وَ هَذِهِ وَصِیَّتِی یَا أَخِی إِلَیْکَ وَ ما تَوْفِیقِی إِلَّا بِاللَّهِ عَلَیْهِ تَوَکَّلْتُ وَ إِلَیْهِ أُنِیبُ قَالَ ثُمَّ طَوَى الْحُسَیْنُ الْکِتَابَ وَ خَتَمَهُ بِخَاتَمِهِ وَ دَفَعَهُ إِلَى أَخِیهِ مُحَمَّدٍ ثُمَّ وَدَّعَهُ ».
امام (ع) وصیتده آللاهین یگانه اولماسینا، حضرت محمد(ص) پیغمبر اولماسینا و معادا شهادت وئرهرک باشلامیشدیر. امام (ع) اسلام دینینده اولدوغونو وورغولامیشدیر کی، گلهجکده اولانلار اونو خارجی (مسلمان اولمایان) کیمی قبول ائتمه سینلر. امام (ع) بو وصیتده قیامداکی اوچ هدفینی آچیقلامیشدیر.
۱٫ پیغمبر (ص) امتینده اصلاحلار ائتمک. امام (ع) بو قیاما ۵۷ یاشیندا باشلامیشدیر. حسین انقلابینین عظمتینی درک ائتمک اوچون گرک بیلک کی، بو ۵۷ ایلده اسلام امتینین باشینا نهلر گلمیشدیر. نهلر باش وئرمیشدی کی، امام (ع) اوچون شهادتدن ساوایی یول قالمامیشدیر. امام (ع) بویورور: “ایسته ییرم کی، جدیمین امتینی اصلاح ائدیم“.
۲٫ امر به معروف و نهی از منکر. دینی جمعیتین ساغلام اولماسینا شرایط یارادان عاملردن بیری ده امر به معروف و نهی از منکردیر. امام حسین (ع) بویورور: “مگر گؤرمورسونوزمو کی، حاققا عمل ائتمیرلر و باطلدن نهی ائدیلمیر؟ بو جور شرایطده مؤمن گرک آللاهلا گؤروشه حاضر اولسون“.
۳٫ پئیغمبر (ص) و امام علی (ع) سنتینه عمل ائتمک. یعنی، اونلارین گئتدیگی یولو داوام ائتدیرمک. معلوم اولور کی، ۵۰ ایلده پئیغمبر (ص) سنتی او قدر دگیشیب کی، امام (ع) بویورور: “ایسته ییرم کی، جدیمین و آتامین سنتینه عمل ائدیم“.
امام (ع) سوندا بویورور: “هر کیم کی، منیم حاق دعوتیمی قبول ائدر، آللاهین حاقینی یئرینه یئتیرمیش اولار. هر کیم منیم دعوتیمی قبول ائتمز، صبر ائدرم کی، آللاه منیمله انسانلار آراسیندا حکم ائتسین“.
