اوروم نیوز، مولانا سلطان الشعرا محمد بن سلیمان فضولی بغدادی (۱۴۸۳-۱۵۵۶میلادی) آذربایجان و تورک شعرینین زیروه لرینده دایانانلارداندیر.
فضولی هم شاعردیر هم عارف. مرثیه ادبیاتیمیز اونونلا باشلاییب و اونون باشلاتدیغی یول بئش یوز ایل ایچینده بؤیویرک دئمک اولار بوتون اسلام عالمینی بورویوبدو.
اولو شاعریمیز تورک، فارس و عرب دیللرینده یازیب یارادیب، دیوانلار اؤزوندن یادگار قویوبدو.
فضولی بایات تورکلریندن ایدی و عراقین حلّه سینده دوغولارکن، باغداددا بویا باشا چاتدی و اؤز آغاسی و سروری حضرت حسین(ع) شهادته چاتان یئرده یعنی کربلادا تورپاغا تاپشیریلیب. او همده امام حسین(ع) خادمی ایدی.
مولانا فضولی نین بوتون تورکجه شعرلری، کتابلاری ، دیوانلاری و فارسجا شعرلرین ترجمه لری بیر یئره توپلاناراق «مولانا محمد فضولی نین تورکجه دیوانی » آدی ایله ۱۳۹۱-جی گونش ایلینده یاز نشریاتی طرفیندن یایینلانیبدیر و ایندیه دک فضولی دیوانلارینین ان مکملی و قاپساملی سی دیر.
کتاب ۱۰۶۷ صحیفه ده اورمیه لی ادبیات اوستادی بهرام اسدی طرفیندن حاضرلانیب . فضولی نین بو کتابدا اولان مرثیه شعرلریندن نمونه:
مرثیه
ماه محرم اولدو شفقدن چیخیب هلال
قیلمیش عزا تؤکوب قدِ خم بیرله اشک آل
اولاد مصطفایه مدد قیلمامیش فرات
کئچیرمهسینمی یئرلره آنی بو انفعال؟
چوخدور حکایتِ المِ شاه کربلا
البتّه چوخ حکایت اولور موجب ملال
قصد ائیلهسن غمِ شهدا شرحین ائتمگه
هر سبزه کربلادا آچیبدیر زبانِ حال
تجدید ماتم شهدا قیلدی روزگار
زار آغلا ای کؤنول بوگون اولدوقجا احتمال
میدانِ چرخی جلوهگهِ دودِ آه قیل
گردون دونه کسوتِ ماتم سیاه قیل
ماه محرم اولدو مسرّت حرامدیر
ماتم بوگون شریعته بیر احترامدیر
تجدیدِ ماتمِ شهدا نفعسیز دگیل
غفلتسرای دهرده تنبیهِ عامدیر
غوغای کربلا خبرین سهل سانما کیم
نقصِ وفای دهره دلیلِ تمامدیر
هر ذرّه اشک کیم تؤکولور ذکرِ آلایله
سیّاره سپهرِ علوِّ مقامدیر
هر مدِّ آه کیم چکیلیر اهلِ بیت ایچون
مفتاحِ بابِ روضه دارالسّلامدیر
شاد اولماسین بو واقعهدن شاد اولان کؤنول
بیر دم بلا و غصّهدن آزاد اولان کؤنول
تدبیرِ قتلِ آلِ عبا قیلدین ای فلک
فکرِ غلط، خیالِ خطا قیلدین ای فلک
برقِ سحابِ حادثهدن تیغلر چکیب
بیر-بیر حواله شهدا قیلدین ای فلک
عصمت حرمسراسینا حؤرمت رواایکن
پامالِ خصمِ بیسر و پا قیلدین ای فلک
صحرای کربلادان اولان تشنهلبلره
ریگِ روان و سئیلِ بلا قیلدین ای فلک
تخفیف قدر شرعدن اندیشه قیلمادین
اولاد مصطفایه جفا قیلدین ای فلک
بیر رحم قیلمادین جگری قان اولانلارا
غربتده روزگاری پریشان اولانلارا
باسدیقدا کربلایه قدم شاه کربلا
اولدو نشانِ تیرِ ستم شاه کربلا
دودِ دلِ پرآتش اهلِ نظارهدن
ایتمیشدی پردهدار حَرَم شاه کربلا
اولدوقجا عؤمرو راحتِ دل گؤرمهییب دمی
اولموش میشه همدمِ غم شاه کربلا
اعدا مقابلینده چکنده صفِ سپاه
قیلمیشدی مدِّ آهی عَلَم، شاه کربلا
یا شاه کربلا نه روا بونجا غم سنا
دردِ دمادم و الم دمبهدم سنا
ای دردپرور المِ کربلا حسین
وی کربلا بلالرینه مبتلا حسین
غم پاره-پاره باغرینی یاندیردی داغایله
ای لاله حدیقه آلِ عبا حسین
تیغِ جفاایله بدنین اولدو چاک-چاک
ای بوستانِ سبزه تیغِ جفا حسین
یاخدی وجودونو غمِ ظلمتسرای دهر
ای شمعِ بزمِ بارگهِ کبریا حسین
دؤورِ فلک ایچیردی سنا کاسه-کاسه قان
ای تشنه حرارتِ برقِ بلا حسین
یاد ائت فضولی، آلِ عبا حالین، ائیله آه
کیم برقِ آهایله یاخیلیر خرمنِ گوناه.
قئید ائتدیگیمیز کتابی پست یولو ایله الده ائتمک و یا ساتیش یئرلرینی اؤیرنمک اوچون، اوروم نیوز ایله ایلگی قورون.
