اوروم نیوز، محرم آیی پیغمبر (ص) و اهلی-بیتینین (ع) غم و غصه آییدیر. ۶۱-جی هجری-قمری ایلینین محرم آییندان بری اهل بیت (ع) داوامچالاری هر ایل عزادارلیق کئچیریرلر. بو مصیبتی دیلله تصویر ائتمک اولماز. بوندان دا بؤیوک مصیبت اولا بیلرمی؟ امام علی نین (ع) اوغلونا، پیغمبرین (ص) جیگرپاره سینه نبی نین وفاتیندان هئچ ۵۰ ایل کئچمهمیش سلاح چکدیلر. اؤزو ده او کسلر کی، اؤزلرینی همین پیغمبرین (ص)امتی حساب ائدیردیلر.
کربلا بیر حادثه دگیلدیر، اصلینده بیر مکتبدیر کی، عصرلر بویو یوز مینلرله انسان بو مکتبده تربیه اولموشدولار. تاریخ بویو او قدر انسانلار اولموشدور کی، عزادارلیق مجلسلرینده اشتراک ائدهرک عقیده لرینه قاییتمیشدیلار. کربلا و عاشورا انسانلارین حیاتا اولان باخیشینی دگیشدیریر.
محرم – توبه آیی دیر، آللاها قاییتماق آیی دیر، دوزگون یاشاماق آیی دیر، دوزگون اؤلمک آیی دیر. محرم انسانا دوزگون یاشاماغی و بو فانی دونیایا باغلانماماغی اؤیرهدیر. محرم و کربلا – اخلاقی فضیلتلرین ان عالی سیدیر. محرم آیی نمونهلر گتیرهرک، بیزه اخلاق درسی وئریر. محرم – وفا درسی دیر، عزت و آزادلیق درسی دیر.
محرم آیی ائله بیر آیدیر کی، گوناه اهلی بئله، اؤزونو دگیشدیرر. ایللر بویو عادت ائتدیگی پیس ایشلریندن ال چکر و بو آیا احترام قویار. اونا گؤره ده محرم آیی هم ده گوناهدان ال چکمهیه عزم ائدیلن آیدیر.
محرم توبه آیی دیر و چوخ سایدا گوناهکارین دوز یولا هدایت اولدوغو آیدیر. کربلا صحنه سینده بونون بارز نمونهسینی حر ابن یزیدده گؤرمک اولار. حرّ، عمر ابن سعدین امام حسینه (ع) هجوم ائتدیگینی اؤیرنندن سونرا اؤزونه گلدی، آییلدی و توبه ائدهرک، اماما (ع) طرف اوز دؤندردی. یانینداکی سلاحداشلاریندان اولان مهاجر ابن اووسا دئییر: “آللاها آند اولسون کی، من اؤزومو بهشتله جهنم آراسیندا گؤرورم. آللاها آند اولسون کی، بهشتدن باشقاسینی سئچمه یجگم. حتّی اگر منی تیکه-تیکه ائتسهلر و آتشه وئرسهلر بئله!”. سونرا آتینا شاللاق ووروب امام حسینه (ع) طرف گئتدی و حضرته (ع) دئدی: “ای رسول اللهین اوغلو! من همین او کسم کی، سیزین قاییتماغینیزا مانع اولدوم. سیزی بو یئرده قالماغا وادار ائتدیم. ایندی بو عملیمه گؤره آللاه درگاهیندا باغیشلانماغیمی ایسته ییرم. ایسته ییرم کی، جانیملا سیزه یاردیم ائدم و گؤزلرینیزین اؤنونده اؤلم. سیزین یانینیزا گلمیشم. بونو توبه کیمی قبول ائدرسینیزمی؟”. امام (ع) بویوردو: “بلی، آللاه توبه نی قبول ائدر و سنی باغیشلایار. سنین آدین نه دیر؟”. حرّ دئدی: “من حرّ ابن یزیدم”. امام (ع) بویوردو: “آنان سنی آدلاندیردیغی کیمی (حرّ) سن آزادسان. آللاهین اومودو ایله دونیا و آخرتده آزادسان. آتدان دوش“.
بئلهلیکله، حرّ شیطانین اوردوسوندان آللاهین اوردوسونا قوشولور و تؤوبه ائدیر. آللاه انسانا کرامت بخش ائتمیشدیر. بئله کی، اونو خلقت عالمینین گول چلنگی قرار وئرمیشدیر. عالمده اولانلارین هاممی سینی انسانین خدمتینه گتیرمیشدیر.
بو جور انسان اؤزونو ذلیل ائتمگه لایق دگیلدیر. بو جور انسان هئچ بیر زامان عزتینی الدن وئرمگه حاضر اولمامالی دیر. ائله بونا گؤره ده امام حسین (ع) ذلیل قالماقدان، مرد و ایگیدجه سینه شهادتی اوستون بیلیر.
عاشورا بیزلره عزت درسی وئریر. انسان اگر بو دونیادا آخرتینه نظر سالارسا، آخرت سعادتینی دونیانین تئز کئچن خوشلوقلاریندان اوستون بیلر. کربلادا امام حسینه (ع) قارشی چیخانلارین هدفی دونیا مالی و رفاها چاتماق ایدی. اونا گؤره ده عاشورا بیزه اؤیرهدیر کی، دونیایا مادی ثروت الده ائتمک اوچون نظر سالمایاق. دونیایا آخرته چاتماق اوچون بیر واسطه کیمی باخاق. ق: دگرلرسیته سی
