اوروم نیوز، اورمیه نین اسلامی شورا مجلسینده اولان ملت وکیلی مخبریمیزله دانیشیقدا دئدی: جمهورباشقانی روحانی، مجلسده تصویب اولان قانونلاری سایمیر.
نادر قاضی پور آرتیردی: روحانی ایکینجی احمدی نژاد اولمامالی دیر. او دانیشیقلار آدی ایله ملتین باشینی قاتیر و بیر طرفدنده دولتین الینده اولان جنسلرین قیمتلرینی آرتیریر و اؤز ایشین گؤرور.
او بونو دئیه رک کی مجلسین بیر سیرا قانونلاری دولت طرفینده اجرا ائدیلمه ییر، وورغولادی: فن و حرفه قورومونون مربی لرینین رسمی استخداملاری و نفت شرکتینین استخدام قانونو دولت طرفیندن اجرا ائدیلمه ین قونولارداندیر کی مجلسده ده تصویب اولونموشدو.
قاضی پورون دئدیگینه گؤره اورمو گؤلونون جانلاندیرماسی حاقیندادا دولت ایندیه دک یالنیز شعار وئریب و بو گؤلون یئنی دن برپا ایشلری یالنیز جلسه لر و سمینارلاردا خلاصه ائدیلیب.
او ها بئله اکیلمه مه ( طرح نکاشت دریاچه اورمیه ) طرحینی، اکین اصلاحی طرحینه چئوریلمه سی حاقدا سؤز آچارکن، دئییب: قئید ائتدیگیم طرحلر و پروژه لر اورمو گؤلونون جانلاندیرماسی بهاناسی ایله غربی آذربایجان اکینچی لیگینی هدف توتمامالی دیر.
قاضی پور بیان ائتدی: آیری سو حوضه لریندن اورمو گؤلو حوضه سینه سو داشینما پروژه لری گئرچکلشیرسه، بو گؤلون جانلانماسینا شاهد اولاجاییق.
اورمیه ملت وکیلی سوندا خاطرلاتدی: اورمو گؤلو سو تؤکولمه حوضه سینده بو گؤله دوغرو تؤکولن سولار گرک پتروشیمی، فابریکالار و استانسیا-نیروگاهلاردا گؤله تؤکولمه میشدن اؤنجه ایشله دیله.
