اوروم نیوز، غربی آذربایجانین عزادارلیق هئیتلرینین شوراسی نین باشقانی مخبریمیزله دانیشیقدا دئدی: بو ایل وقف اداره سی ایله ائدیلن آنلاشمالاردا، بو قرارا گلدیک کی ولایتیمیزین بوتون هیئتلری اؤز عزادارلیق مراسملری اوچون گرک مجوز آلسینلار.
نریمانی آرتیردی: نظارت، یوخلاما و ترتیبلتمه ایشلری بو شورانین وظیفه لریندندیر.
او وورغولادی: ولایتیمیزین گئنلینده دؤرد مین ۸۰۰ مذهبی هئیت فعالیت گؤستریر کی بؤلگه ده و ولایتده اولان سیاسی شرایطه گؤره اونلار بو ایل مجوزسیز چالیشا بیلمه یه جکلر.
نریمانی نین دئدیکلرینه گؤره آبان آیی نین ایکی سی و سککیزینده بوتون هئیتلرین و اورمیه اهالی سینین قاتیلیمی ایله توپلو و بؤیوک عزادارلیق مراسمی کئچیریله جک.
نریمانی بونو آرتیراراق کی عزادارلیق دسته لری ائده بیلمزلر تلقینین ائنی ۸۰ سانتی متردن یوخاری دؤهول قوللانار آرتیردی: هر دسته ایکی دؤهولدنده چوخ قوللانماز و بو قرارلاری پوزانلار، یوکسک دوزئیلی کولتورل شورانین قراری ایله قانونسوز و تخلف ائدن دسته عنوانی ایله محکمه قارشینا چیخمالی اولاجاقلار.
او سوندا خاطرلاتدی: حسین آباد، علی آباد، صمدزاده، کشتارگاه محله لری و امامزادالاردا پولیس ایله ایش بیرلیگی حاقدا دانیشیقلار آپاریلیب. نیه کی کئچن ایللر بو محله لرده بؤیوک ترافیک سورونلاری ایله اوز-اوزه گلدیک و انشاء الله بو ایل هئیتلرین مسئوللارینین یاردیمی ایله حل اولاجاقدی.
