اوروم نیوز، ۱۳۸۹-جو ایلدن بری غربی آذربایجانین هنری حوزه سینده قورولان اشیقلار درنگی، ایندیه دک ۱۶۰-دان چوخ آشیق موسیقی سی برنامه سی اجرا ائدیبدیر.
بو درنک آچیلیدیغی گوندن بری، چالیشیقلاری بونا اولوب کی آشیقلاری اجتماعدا گوندمه داشیسین و ایتیب باتماسینا مانع اولسون کی بو یولدا آزدا اولسا بیر سیرا اوغورلارا چاتیبدیر.
آشیقلار درنگی نین هفته لیک توپلانتی لاری دوشنبه گونلری ساعات دؤرددن آلتی یا قدر اولور و هر هفته مختلف قشرلر هنری حوزه یه گلرک، قورولان مجلسدن فایدالانیرلار.
بو درنگین ۱۳۰ عضوو وار و دفتر-دستگینده اورمیه، خوی، قوشاچای، سالماس، سولدوز و بیناب کیمی شهرلردن آد یازدیرانلار گؤزه چارپیر.
اورمو آشیق مکتبینی گله جک نسیللره چاتدیرماق ایسته ییریک
(بو سؤزو غربی آذربایجان آشیقلار درنگی نین مودورو داریوش علیزاده دئییر.
او بو خصوصدا دئدی: آشیقلار درنگی، اورمو آشیق مکتبی نی گلیشدیرمگی ان اؤنملی مقصد بیلرک، بو یولدا قدم آتیر.
علیزاده آرتیردی: اورمو آشیق مکتبی عرفانی و مذهبی بیر مکتبدیر و او بیری مکتبلرله مقایسه ده آرادان گئتمه تهلوکه سی یوخاری دی.
علیزاده کولتورل هجومون نشان آلدیغی هدفلردن بیرینی آشیق موسیقی سی آدلاندیراراق، بیان ائدیب: بیز بو مذهبی ، محلی و ملی موسیقی و صنعتیمیزله ائده بیلریک جوانلاریمیزین چوخلو فسادلاردان و غرب طرفینه چکیلمه دن قورویاق.
آشیقلار درنگی نین مودورو جوانلاری بو مکتبه جذب ائتمگی بوتون اورقانلار و قوروملارین وظیفه سی بیلیب و بئله وورغولادی: رادیو-تلویزیون بو یولدا گرکن آددیملاری آتماییر و . بو قوروم وظیفه سینه عمل ائتسه ائده بیلر چوخلو ایشلر گؤره. نیه کی ان ائتگی لی عامل بو صنعتی آیاقدا توتماقدا ، رادیو و تلویزیوندور.
کولتورل قوروملار اورمو آشیق مکتبینه یئترینجه دگر وئرمه ییبلر
آشیق ادبیاتی و موسیقی سینین آراشدیرماجیلاریندان اولان احمد اسدی ده مخبریمیزله دانیشیقدا آرتیردی: کولتورل قوروملار دا ایندیه دک آشیق صنعتی و اؤزللیکله اورمو مکتبینه یئترینجه دگر وئریلمه ییبلر.
او بونو دئیه رک کی رادیو و تلویزیونون بیر سیرا نظارتسیز ایشلری بو موسیقی یه بؤیوک ضربه لر ائندیریر، دئدی: بیر شرایطده کی آشیقلیغیمیز گئت-گئده آرادان گئدیر، اسلامی ارشاد اداره سی و رادیو ایله تلویزیونون وظیفه سی دیر بو ایشین قاباغین آلا و مختلف عملی و اصولی وئرلیشلر و فئستیواللار قورماقلا مین ایللردن بیزه ارث قالان اورمو آشیق مکتبی نی قالخینما سمتینه آپارالار.
اسدی بونا اشاره ائدرک کی اورمو آشیق مکتبی اؤزونه مخصوص و تایی اولمایان بیر مکتبدیر و بو مکتبده عرفانی و مذهبی ائلئمانلار گؤزه چارپیر وورغولادی: آشیق مکتبلریمیزین هامیسی گؤزل و اینجه دیر و هره سینینده بیر اؤزللیگی وار، مثلا اورمو آشیق مکتبی نین شعرلرینه دقت وئردیکده هئچ زمان بو مکتبه عائد آشیقلار آراندان، یایلاقدان و طبیعتدن اوخوماییرلار و اوخونان شعرلرین یوزه دوخسانی اسلاما، مذهبه و درویشلیگه عائد سؤزلردیر. بیر حالداکی مثال اولاراق قره داغ مکتبینده طبیعت و گؤزللیک مفهومو گؤزه چارپیر .
آشیق ادبیاتی نین گنج آراشدیرماجی سی خاطرلاتدی: تأسفله بوگون تکجه قزئته لرده و مختلف سایتلاردا آشیقلیغیمیزین اصیل مکتبینی تانیتدیرا بیلیریک و بو یولدا گرکیر هامی میز او جمله دن مئدیا اهلی بوینوموزا دوشن وظیفه لری یئرینه یئتیرک.
هر حالدا بوگون آشیقلار درنگی هفته لیک برنامه لرینی دوام ائتدیریر و بورادا مختلف شهرلردن و کندلردن گلن آشیقلار بیر-بیرلری ایله تانیش اولاراق، ملتیمیزده اونلاری تانی ییر.
بیر شرایطده کی باشقا ملتلرین موسیقی لری یوخاری کیفیتلرله و مختلف یوللارلا او جمله دن ماهواره دن ملتیمیزین راحاتلیقلا الینه چاتیر، تأسفله بیزیم آشیق موسیقی میزین اؤنونده بؤیوک مانعلر وار و گوندمه چیخما امکانی هله لیک یوخودور.
اورمو آشیق مکتبی نین اوستادلاری آردیجیل بو مجلسلرده چیخیش ائدرک، گله جک ایللرده ده بو صنعتین دواملی اولدوغونو و جوانلاریندا بو مکتبی یئیه لنمگینی آرزیلاییرلار.
