اوروم نیوز، عربستان و آمریکانین، ایران و روسیه اقتصادلارینا ضرر وئرمک هدفی ایله ال بیر اولدوقلارینی سؤیله ین دونیا بانکاسی سؤزجوسو، ایراندا گئرچکلشدیریلن و جسارت گرکدیرن بعضی اقتصادی و پولیتیک دوزنلمهلرین، تحریملرین قالدیریلماسی و نفت قیمتی نین آرتماسیندان داها ائتگی لی اولاجاغینی سؤیلهدی.
مخانین خبرینه گؤره بین الخالق نفت قیمتلرینین دوشمهسی ایله بوگونلرده قطر، عربیستان، بیرلشمیش عرب امیرلیکلری و عراق کیمی فارس کؤرفزی اطرافینداکی اوپکه عضو اؤلکهلرینین قیمت دوشورمه ساواشی ایچینه گیردیکلرینی گؤروروک.
نیجریه، لیبی، آنگولا و ونزوئلا کیمی بعضی آفریقالی و لاتین آمریکالی اؤلکهلر بو قیمت دوشوشلرینه اعتراض ائتسهلر ده، بیرچوخ انرژی اوزمانینا گؤره عربیستان و آمریکا دولتلرینین، ایران، روسیه و ونزوئلا کیمی اؤلکهلرین اقتصادلارینا زیان وئرمک اوچون بیرلیک اولدوقلاری و فنت قیمتلرینی ائندیردیکلری گؤروشوندهدیلر. عربیستان و آمریکا بیرلشمیش دولتلری داها اؤنجه ده ۱۹۸۵ ایلینده بیرلیک یاراتمیش نفت قیمتینی دوشورهرک، سووئتلر بیرلیگینین چؤکمهسینی ساغلامیشدی.
تهوماس ل. فریدمان ایسه بو قونو حاقیندا یازدیغی بیر یازیدا ” نفت قیمتی نین دوشوشو، چین و آوروپانین اقتصاد گلیشمه لرینین یاواشلاماسینین سونوجوندادیر. آیریجا آمریکا دا یئنی تکنولوژی لر یاردیمی ایله، دونیانین ان بؤیوک نفت اورتیجیلریندن بیری اولدو. عربیستان ایسه نفت قیمتلرینین دوشمهسینی ساغلاماق اوچون تولیدینی آزالتماییر و قیمتلرین دوشمهسینی، اوپک عضوو آیری اؤلکهلردن داها چوخ پای آلاراق تلافی ائدیر.
بو ندنلردن دولایی ایران و روسیه کیمی اؤلکهلر اوچون چتین بیر دوروم اورتایا گلیر. بو ایکی اؤلکه، آمریکا و عربیستان ایله سوریه اوستونده ساواشیرلار، و ایندیلیکده ده نفت ساواشی آدینداکی یئنی بیر ساواش ایچریسینده دیلر ” دئیه یازدی.
یازینین دوامیندا ایسه فریدمن، ” ایران و روسیه، اقتصادی اولاراق داغیلامایاجاقلاردیر آما نفت قیمتلرینین ۷۰ دولارین آلتینا دوشمهسی دورومدا، آمریکانین اورتیمی ده آزالاجاقدیر. چونکو یئنی نفت آراما یؤنتملرینین آرتیق اقتصادی چیخاری اولمایاجاقدیر. آما شبههسیز نفت قیمتی نین دوشمهسی، آمریکا و عربیستانین یارارینا و ایران و روسیهنین ضررینه اولاجاقدیر. انرژی ادخالاتیندان الده ائدیلن گلیرلر، ایران اقتصادینین ۶۰% و روسیه اقتصادینین یوزده ۵۰دن چوخونو تشکیل وئریر ” دئدی.
بو دوغرولتودا مخایا دانیششان آمریکانین جورج واشینگتون اونیورسیتهسینین بین الخالق تجارت اوستادی، حسین عسگری ، آمریکا و عربیستانین ایران و روسیه علیهینه نفت قیمتینی آزالتما ساواشی آچدیغینی سؤیله یرک، ” قیمتلرین دوشورولمهسی، ایران و روسیه اقتصادلارینا ضرر وئرمک و پولیتیک چیخارلار ساغلانا بیلمک آماجی ایله گئرچکلشن بیر اویغولامادیر.
نفت قیمتی نین ۵۰ دولارین آلتینا دوشمهسی و بو سورجین ۲-۳ ایل دوام ائتمهسی، ایران اقتصادینا بؤیوک درجهده ضرر وئره جکدیر. بؤیله بیر دورومدا، تحریملرین قالدیریلماسی دا ایران اوجون بیر قازانچ ساغلامایاجاقدیر ” دئدی.
ایران اقتصادینین نفت تولیدینه اولان باغلیلیغینین بو قیمت آزالماسیندان شوکه اولماسینا ندن اولدوغونو سؤیله ین عسگری، ” ایران اقتصادینین بینؤوره لی دگیشیکلیکلره احتیاجی وار. اقتصادی قوروملار گلیشمه لی، اونلارین یئرینه داها گوجلو اقتصادی قوروملار گلمهلی و اقتصادی خلافلار ایله مجادله ائدیلمهلی دیر.
ایرانین نفت قیمتی نین آزالماسی ایله، تحریملردن داها چوخ ضرر گؤره جگینه اینانیرام. آما دقت ائدیلمهسی گرکن قونو، جسارت وئرن بعضی بینؤوره لی اقتصادی دگیشیملرین، تحریملرین قالدیریلماسی و نفت قیمتی نین یوکسلمهسیندن داها ائتگی لی اولاجاغینی دوشونورم. عمومی اولاراق ایران، تحریملرین قالدیریلماسی و یا نفت قیمتلرینین آرتماسینی بکلهمک یئرینه، اقتصادینین داها وئریملی اولماسی اوزرینه چالیشمالی دیر ” دئدی.
