اوروم نیوز، داریوش علیزاده مخبریمیزله دانیشیقدا دئییب: دؤرد ایله یاخین دیر کی غربی آذربایجانین هنری حوزه سینده آشیقلار درنگین یولا سالمیشیق و بو مدتده ۱۶۰ هفته لیک برنامه میز اولوب.
غربی آذربایجان آشیقلار درنگی نین سوروملوسو آرتیریب: بو درنگین بیرنیجی هدفی اورمو آشیق مکتبی نی قوروماق و گله جک نسیللره چاتدیرماقدیر.
او بونو دئیه رک کی ایلگی لی قوروملار ایندیه دک آشیق صنعتی و اؤزللیکله اورمو مکتبینه یئترینجه دگر وئرمه ییبلر وورغولادی: بیر شرایطده کی مختلف موسیقی لر یوخاری کیفیتلرله مختلف یوللارلا او جمله دن ماهواره دن ملتیمیزین راحاتلیقلا الینه چاتارکن، تأسفله بیزیم اورمیه تلویزیونوندا آشیق موسیقی سینه یئر یوخدو.
علیزاده کولتورل هجومون نشان آلدیغی هدفلردن بیرینی آشیق موسیقی سی آدلاندیراراق، بیان ائدیب: بیز بو مذهبی ، محلی و ملی موسیقی و صنعتیمیزله ائده بیلریک جوانلاریمیزین چوخلو فسادلاردان و غرب طرفینه چکیلمه دن قورویاق.
غربی آذربایجانین هنری حوزه سینین موسیقی سوروملوسو هابئله آرتیریب: بیر شرایطده کی آشیقلیغیمیز گئت-گئده آرادان گئدیر، اسلامی ارشاد اداره سی و رادیو ایله تلویزیونون وظیفه سی دیر بو ایشین قاباغین آلا و اؤز بویونلارینا دوشن وظیفه نی یئرینه یئتیره.
او آشیقلاری کئچمیشده ائلین آغ ساققاللاری و بؤیوکلری آدلاندیریب و دئدی: اورمو آشیق مکتبی مذهبی و عرفانی بیر مکتب دیر و حتی اوخونان سؤزلرده دائم آللاهی و ائمه نی یاد ائتمه باشدا قرار تاپیر.
غربی آذربایجان آشیقلار درنگی نین سوروملوسو سوندا خاطرلاتدی: مختلف فئستیواللار قورماق، آشیقلارین سس و گؤرونتولرینی لنته آلماق و جامعه ده آشیق موسیقی سینه علاقه نی آرتیرماق بو درنگین گله جکده ان اهمیتلی برنامه لریندن دیر.
