حجّاج آپاراندا منایا قوچ – قوزو قوربان
اؤز جانلارین عشّاق هراسان آپارارلار
قوربان بایرامى
بایرامدا کى ملّت قوزو قوربان آپارارلار
عاشقلریمیز تحفه یارا جان آپارارلار
هر بیر گولوشه مین جانى تقدیم ائلهیرلر
هر بیر باخیشا یوزلرى احسان آپارارلار
جاهل دوروخارکن ده حروف اوسته قالاندا
عارفلریمیز سینهده قورآن آپارارلار
جهل ایله شیاطین بیزى ساخلار قارا یئرده
آیتلریمیز معراجا انسان آپارارلار
آللاها وئریب جانینى مؤمن جان آلاندا
زاهدلر عجب اویخودا قیلمان آپارارلار
حجّاج آپاراندا منایا قوچ – قوزو قوربان
اؤز جانلارین عشّاق هراسان آپارارلار
یارب گؤرهسن نئیلهیهجکلر دلى عشّاق
بایرامدا کى ملّت قوزو قوربان آپارارلار.
شعر: بهرام اسدی
