اوروم نیوز، ایران اسلام جمهوریتینین گؤمروک ادارهسینین رئیسی آذربایجان جمهوریتینین اقتصاد و صنایع باخانی ایله گؤروشوب و دانیشیقلار آپاریب.
مسعود کرباسیان بو گؤروشده ایکی اؤلکه جمهورباشقانینین روسیه نین هشترخان شهرینده کی گؤروشونه توخوناراق، مناسبتلرین گئنیشلنمهسینده طرفلرین ارادهسینی جدّی آدلاندیریب و دئییب: بو مسئله بیز گؤمروک مسئوللارینین ایشینی ایکی اؤلکهنین گؤمروک مانع لرینین آرادان قالدیریلماسیندا ایکی قات آرتیریر.
مسعود کرباسیان ایران و آذربایجانین مشترک اقتصادی کومیسیونونون ۹-جو اجلاسینین کئچیریلمهسینه توخوناراق، مشترک کومیسیونون قرارلارینین جرا اولونماسینین واجبلیگینی وورغولاییب و دئییب: ایران اسلام جمهوریتی بو قرارلارین مادهلرینین اجرا اولونماسیندا قطعیتلیدیر.
ایرانین گؤمروک ادارهسینین رئیسی محصوللارین و وطنداشلارین کئچیدی اوچون داها آرتیق ساده لشدیریلمهنین یارادیلماسی استقامتینده یئنی فیکیر مبادلهسی و حل یوللارینین تاپیلماسی اوچون سرحد گؤمروک ادارهلری رهبرلری آراسیندا داواملی شکیلده گؤروشلرین باش توتماسینی فایدالی آدلاندیریب و علاوه ائدیب: بیز گؤمروکلرین ۲۴ ساعاتلیق چالیشماسی اوچون راضی لیق الده ائتمیشیک و تئزلیکله اونون اجراسی زامانینی اعلان ائدهجگیک.
آذربایجان جمهوریتی اقتصاد و صنایع ناظری شاهین مصطافایئو ده بو گؤروشده دئییب: سیزین باکی یا سفیرینیز ایکی اؤلکهنین اساساً سون آیلاردا درین دوستلوغونو گؤستریر. ایکی اؤلکه آراسیندا درین مناسبتلر یارانمیشدیر و بو مسئله ایکی اؤلکه جمهورباشقانلارینین مناسبتلرین گئنیشلندیریلمهسینه خصوصی ماراق گؤسترمهلرینه گؤرهدیر.
شاهین مصطافایئو ایرانا سفریندن راضی لیق ائدهرک بیلدیریب: خوشبختلیکدن ایکی اؤلکه رسمی لرینین سفرلری مقصدلی و پروقرام اساسیندا باش توتور و بو سفرلرین مناسبتلرین مؤحکملنمهسینده مثبت تاثیرلری اولاجاق.
تجارت، ترانزیت، انرژی، نفت و کند تصروفاتی ساحه لرینی امکداشلیق اوچون مختلف ساحه لر آدلاندیران مصطافایئو دئییب: بو آرادا تجارتاً اساساً ده اؤزل سکتور آراسیندا گوجلندیریلمهسی اوچون گؤمروکلرین رولو چوخ تعیین ائدیجیدیر.
آذربایجان جمهوریتینین اقتصادیات و صنایع باخانی ایکی اؤلکه جمهوریتینین هشترخانداکی گؤروشونه توخوناراق، خزریانی اؤلکهلر آراسیندا امضالانان سندی تاریخی آدلاندیریب و دئییب: بو سندین امضالانماسی بو اؤلکهلر آراسیندا امکداشلیقلارین گئنیشلنمهسینه سبب اولاجاق.
شاهین مصطافایئو مشترک تیجارت پالاتاسینین یارادیلماسی اوچون اؤلکهسینین حاضرلیغینی بیلدیریب و دئییب: ایران طرفی ماراقلی اولدوغو حالدا بو لایحهنی اجرا ائتمگه حاضریق.
ایرانین گؤمروک ادارهسینین رئیسی آذربایجان جمهوریتی دؤولت گؤمروک خدمتی رئیسینین رسمی دعوتی ایله بو اؤلکهیه سفر ائدیب.
مسعود کرباسیان بو سفرده اؤز آذربایجانلی همکاریندان علاوه،بو اؤلکهنین بیر نئچه باخانی ایله ده گؤروشهرک، دانیشیقلار آپاریب.
