بەپێی هەواڵی ئرووم نیوز بە گێڕانەوە لە کوردپرێس، دوێنێ لە سەلاحەدین مەسعود بارزانی سەرۆکی هەرێمی کوردستانی عێراق پێشوازیی لە فرانک بێکەر باڵیۆزی بریتانیا لە عێراق و شاندێکی یاوەری کرد.
مەسعود بارزانی لەم دیدارەدا جەختی کرد کە ئەو خەڵکانەی هاوکاریی داعشیان کردووە و بەشداربوونە لە کوشتن و بڕین و تاڵان و دەستدرێژی بۆ سەر خەڵک دەبێ بە توندی سزا بدرێن و تاوانباران لەو کەسانە جیا بکرێنەوە کە لەگەڵ تیرۆریستاندا هاودەست نەبوونە. هەروەها لەم دیدارەدا سەرکەوتنەکانی پێشمەرگە بەسەر تیرۆریستان و هەنگاوەکانی هێزە هاوپەیمانەکان و وەشاندنی گورزە ئاسمانییەکان لە دژی تیرۆریستانی داعش لە ناو خاکی سووریا خرایە بەر باس.
پەیوەست بە دژایەتیکردنی تیرۆریستان هەردوولا لەسەر ئەوە هاوڕابوون کە هاوکات لەگەڵ سەرکەوتنی سەربازی بەسەر تیرۆریستان پێویستە لەڕووی سیاسیشەوە لەناوخۆی عێراق و هەروەها لەگەڵ وڵاتانی ناوچەکە کاری جدی بکرێت بۆ نەهێشتن و لەناوبردنی تیرۆریستانی داعش. بارودۆخی هێزەکانی پێشمەرگە لە بەرەکانی ڕووبەڕووبوونەوەی تیرۆر تەوەرێکی دیکەی ئەم دانیشتنە بوو و تێیدا مەسعود بارزانی ئاماژەی بەوەدا کە دەستپێشخەری لەدەستی هێزی پێشمەرگە دایە و تیرۆریستان لە دۆخی بەرگریی و پاشەکشە دان.
