آشیق درویش آدی ایله تانینان درویش وهابزاده ۱۳۰۹-جو ایلده اورمونون کوردلر کندینده دونیایا گؤز آچمیشدی. اونون دوغومو چوخ ماراقلی ایمیش. آدینی دا بیر درویش قویموشدو اونا گؤره درویش ده قالدی.
درویش ایکی ایله یاخین آشیق حسن خان چوبانین یانیندا خدمت ائدیب، درسینی آلمیشدی. او سونرالار آشیق فرهاد اولان قهوه خانالارا گئدیب اوندان سؤز صحبت اؤیره نرمیش، آما چالدیغی قوپوزو تام اونونلا فرقلی اولاراق آشیق چوبانین سبکی و یا باراندوز سبکی ایمیش.
آشیق درویش اورمونون معاصر دؤورده ان مشهور آشیغی دیر و ائده بیلمیشدی اؤز ایستی و سحرکار سسی ایله چوخلو گنجلری و یئنی یئتمه لری بو صنعته ماراقلاندیرا و حتی ایندی کی آشیقلاریمیزین بیر چوخو اونون چالیشیقلارینین نتیجه سینده بو صنعته اوز گتیردیلر. آشیق درویش اورمو رادیوسوندا چوخلو برنامه لر اجرا ائدیب و چوخلو کاسئتلرده اؤزوندن یادگار قویموشدو.
او ۱۳۷۲ جی ایلین بئشینجی آیینین ۹-جو گونونده وفات ائتدی و کوردلر کندینین قبرستانلیغیندا دفن ائدیلدی. روحو شاد اولسون.
